2020 թվականի 44-օրյա պատերազմի Ազգային ժողովի քննիչ հանձնաժողովի նախագահ, ԱԺ «Քաղաքացիական պայմանագիր» խմբակցության պատգամավոր Անդրանիկ Քոչարյանը ոչ թե հանձնաժողովի զեկույցի հրապարակումը, այլ այն ունենալն է կարևոր ձեռքբերում համարում։ Այդ մասին նա հայտնել է լրագրողներին։
Պատգամավորը նշել է, որ ԱԺ նախագահ Ալեն Սիմոնյանի որոշմամբ՝ փաստաթուղթն արդեն փոխանցվել է ԱԺ գաղտնի մաս, ինչը համապատասխանում է կանոնակարգին:
«Հարց է, թե գաղտնի մասից ինչպե՞ս պետք է զեկույցը ճանապարհ անցնի դեպի հանրային մաս, ինչը խնդիր է։ Եթե լիագումար նիստ լիներ, կգտնեինք լուծումը։ Ամեն դեպքում՝ ամենակարևորը նախագիծն ունենալն է»,- նշել է Քոչարյանը։
Նա հավելել է, որ համապատասխան թույլտվություն ունեցող անձինք, ներառյալ՝ գաղտնի տեղեկատվությամբ աշխատելու թույլտվություն ունեցող լրագրողները, կկարողանան ծանոթանալ փաստաթղթին:
Քոչարյանն ընդգծել է, որ այժմ կարևոր է որոշել, թե ինչպե՞ս նյութերը կարող են դառնալ հանրային քննարկման մաս:
Պատգամավորը հիշեցրել է, որ զեկույցն իր ղեկավարությամբ արդեն երրորդ մեծ նախագիծն է. նա մատնանշել է 2008-ի մարտի 1-ի դեպքերն ուսումնասիրող փաստահավաք խմբի, ինչպես նաև 2016-ի քառօրյա պատերազմի զեկույցները:
«Այն խմբերը, որոնք ես ղեկավարել եմ, թողել են մնայուն արժեքներ՝ փաստարկների հավաքագրում, ինչը մեծ արժեք է դասեր քաղելու առումով»,- նշել է Քոչարյանը:
Քոչարյանի խոսքով՝ Մարտի 1-ի գործը, Մարդու իրավունքների եվրոպական դատարանի որոշմամբ, կարելի է բացահայտված համարել:
Հանձնաժողովն ստեղծվել էր 2022 թվականի փետրվարին, աշխատանքը երկարացվել էր երկու անգամ՝ 2022 թվականի հոկտեմբերին և 2023 թվականի մայիսին։ Հանձնաժողովի լիազորություններն ավարտվել էին 2023 թվականին։ 2024 թվականի սեպտեմբերին հանձնաժողովի նախագահը հայտնել էր, որ 44-օրյա պատերազմի հանգամանքների վերաբերյալ եզրակացությունը պատրաստ է։ Նա նշել էր, որ զեկույցում ներկայացված հայկական կողմի պարտության պատճառները տարասեռ են և բազմաշերտ: Հաշվետվությունն ԱԺ նախագահին ուղարկվել էր միայն մեկ տարի անց՝ 2025 թվականի սեպտեմբերին։
Հոկտեմբերի 1-ին ԱԺ նախագահը հատարարել էր, որ զեկույցն ԱԺ լիագումար նիստերում ներառելու իրավական հիմքեր չկան, բայց այն հրապարակվելու է, ավելի ուշ տեղեկացրել էր, որ այն քննարկելու են փակ լսումներում։ Հոկտեմբերի 6-ին ԱԺ-ից Armenia Today-ին տեղեկացրել էին, որ զեկույցն ԱԺ արխիվ ուղարկելու որոշում է կայացվել։
Կարդացեք նաև՝
Ժամանակ չենք խախտել․ Անդրանիկ Քոչարյանը՝ 44-օրյա պատերազմի քննիչ հանձնաժողովի զեկույցի մասին
44-օրյա քննիչ հանձնաժողովի զեկույցը լիագումար նիստ չի գնա․ Ալեն Սիմոնյան
