ԵԱՏՄ-ից դուրս գալու որևէ օրակարգ չկա․ ընդհակառակը՝ մենք խորացնում ենք մեր հարաբերությունները ԵԱՏՄ գործընկերների հետ, ԱԺ-ում տեղի ունեցած ճեպազրույցի ժամանակ ասել է Տարածաշրջանային և եվրասիական ինտեգրման հարցերի մշտական հանձնաժողովի նախահգահ Վաղարշակ Հակոբյանը։
Նա այսպես է արձագանքել ՀՀ վարչապետ Նիկոլ Փաշինյանի հայտարարությանը, որ Հայաստանը կարող է դուրս գալ ԵԱՏՄ-ից, քանի որ «անհնար է լինել և՛ ԵՄ, և՛ ԵԱՏՄ անդամ»։
«Այսօր քննարկված և քվեարկված համաձայնագիրը նաև դրա մասին էր վկայում, և ես խնդրում եմ ձեզ՝ նման օրակարգ չգեներացնել։ Մենք մեր ԵԱՏՄ գործունեության շրջանակում տնտեսության հետ կապված շատ լուրջ ձեռքբերումներ ունենք և դա գնահատում ենք»,- նշել է նա։
Ըստ Հակոբյանի՝ տարիներ շարունակ ԵԱՏՄ-ից Հայաստանն ավելի շատ վերցրել է, քան տվել, որոշ ժամանակահատվածներում՝ ավելի շատ տվել, քան վերցրել։
«Չեմ կարծում, որ դա ինչ-որ ձև կարող է խոչընդոտ հանդիսանալ ԵԱՏՄ-ի և մեր հարաբերություններում։ Կլինի տարի, որ ավելի շատ կտանք, կլինի տարի, որ ավելի շատ կվերցնենք, այնտեղ հստակ սխեմաներ կան և այդ սխեմաներն աշխատում են»,- շեշտել է Հակոբյանը։
Կառավարությունը հունվարի 9-ի նիստում հավանություն էր տվել ՀՀ-ի՝ ԵՄ-ին անդամակցելու գործընթացի մեկնարկի վերաբերյալ նախագծին։ Փաշինյանն ընդգծել էր, որ նախագիծը չի նշանակում Հայաստանի անհապաղ անդամակցում ԵՄ-ին, և վերջին խոսքը պետք է հայտնեն քաղաքացիները՝ հանրաքվեի միջոցով։ Նույն օրը Կրեմլից նշել էին, որ Հայաստանը չի կարող միաժամանակ լինել և՛ ԵՄ, և՛ ԵԱՏՄ անդամ։
Հունվարի 24-ին ՀՀ ԱԺ եվրոպական ինտեգրման հարցերի մշտական հանձնաժողովը դրական եզրակացություն էր տվել ԵՄ-ին անդամակցելու գործընթացի մեկնարկի վերաբերյալ նախագծին։
