Անկախությունը շարժում է, շարունակվող ընթացք, այն չի ավարտվում որևէ տարեթվով կամ խորհրդանշական տարեդարձով, ՀՀ Անկախության 34-ամյակի առթիվ արված իր ուղերձում հայտարարել է ՀՀ նախագահ Վահագն Խաչատուրյանը՝ շնորհավորելով Հայաստանի քաղաքացիներին։ Նախագահը նշել է, որ «անկախությունն ինքնին արժեք չէ, եթե այն չի ծառայում մեր ժողովրդի անվտանգությանը»։
«Անկախությունն ամեն օր նորոգվող պատասխանատվություն է՝ մեր պետության, հարևանների, սերունդների հանդեպ։ Այն ապրելակերպ է, որը պետք է կյանքի կոչենք հետևողականորեն՝ մեր աշխատանքով, մեր գիտակցությամբ ու մեր միասնականությամբ։ Անկախության օրը ոչ միայն պատմական հիշողության պահ է, այլև ապագայի ճանապարհի ելակետ»,- նշել է նախագահը։
Նա ընդգծել է, որ ուժեղ պետություն կառուցելու ամենամեծ նախապայմանը խաղաղությունն է։
«Խաղաղություն, որ թույլ կտա բացել նոր հնարավորություններ տնտեսության, կրթության, մշակույթի, գիտության համար, որ կապահովի մեր քաղաքացիների վստահությունը վաղվա օրվա հանդեպ, որը կդարձնի անկախությունը ոչ թե նվաճում, այլ մեր երկրի, մեր հասարակության ամենօրյա իրականություն։ Մենք գիտակցում ենք, որ խաղաղությունը միայն արտաքին պայմանավորվածություն չէ․ այն ներքին համոզմունք է, համախմբման և համազգային ուժի արդյունք»,- ընդգծել է Խաչատուրյանը։
Նա հավելել է, որ իշխանությունն այս օրերին քայլեր է ձեռնարկում համապարփակ խաղաղության հաստատման ուղղությամբ, ինչը բարդ ու պատասխանատու գործընթաց է, որը պահանջում է համբերություն, կամք և անկեղծություն։
Խաչատուրյանի խոքով՝ 34 տարի առաջ ժողովուրդը կայացրել է վճռական ընտրություն՝ վերագտնելու և վերահաստատելու իր պետականությունը։
«Այդ ընտրությունը մեզ պարտավորեցրեց անցնել բարդ ու փորձություններով լի ուղի և դիմակայել պատերազմներին, կորուստներին ու դժվարին մարտահրավերներին։ Բայց նաև այդ ճանապարհը մեզ սովորեցրեց, որ անկախությունն ինքնին արժեք չէ, եթե այն չի ծառայում մեր ժողովրդի անվտանգությանը, բարեկեցությանը և խաղաղությանը»,- շեշտել է նա։
Նախագահի խոսքով՝ Հայաստանի առջև ծառացած ամենամեծ ու հրատապ խնդիրն այսօր խաղաղությունն է։
«Տարածաշրջանում խաղաղության հաստատումը կնշանակի նոր որակի հարաբերություններ հարևանների հետ, բարիդրացիական ապրելու հնարավորություն, բաց սահմաններ և նոր հեռանկարներ։ Գիտակցում ենք, որ սա հեշտ ճանապարհ չէ, բայց դա միակ ճանապարհն է, որը կարող է ապահովել մեր երկրի զարգացումը և քաղաքացիների բարեկեցիկ ու արժանապատիվ կյանքը»,- նշել է Խաչատուրյանը։
Անկախության տոնը Հայաստանում նշվում է ամեն տարի սեպտեմբերի 21-ին։ 1990-ի օգոստոսի 23-ին Հայաստանի գերագույն խորհուրդն ընդունել էր Հայաստանի անկախության հռչակագիրը, որտեղ նշված էր, որ ՀԽՍՀ-ն կազմալուծվում է և ձևավորվում է նոր պետություն՝ Հայաստանի Հանրապետությունը։ 1991-ի սեպտեմբերի 21-ին հայ ժողովուրդն անկախության հանրաքվեի ժամանակ կողմ էր քվեարկել Խորհրդային Միության կազմից դուրս գալու օգտին։
