ԱՄՆ նախագահ Դոնալդ Թրամփը լրագրող Մարկ Լևինի հետ հարցազրույցում հայտարարել է, որ ինքն է կարողացել լուծել Հայաստանի և Ադրեջանի միջև հակամարտությունը, սակայն իր ելույթում նա հազիվ է արտաբերել Ադրբեջանի անունը և Հայաստանն անվանել է «Ալբանիա»։
«Տեսե՛ք, Ադրբեջանը․․․ Դա լուրջ խնդիր էր, որը տևեց 34-35 տարի Ալբանիայի (նկատի ունի Հայաստանը- AT) հետ։ Միայն մտածեք։ Շատ տարիներ, իսկ ես ժամանակ ունեցա ծանոթանալու առաջնորդներին, շփվելու նրանց հետ առևտրի միջոցով, որոշ գործեր վարել։ Այդ ժամանակ ասացի՝ «ինչո՞ւ եք ընդհանրապես կռվում միմյանց դեմ։ Ես չեմ պատրաստվում առևտրային գործարք կնքել, եթե շարունակեք կռվել։ Սա խելագարություն է»,- ասել է Թրամփը։
Ըստ նրա՝ Սպիտակ տանը բանակցությունների ժամանակ «մեկ ժամվա ընթացքում կողմերն արդեն գրկախառնվում և շնորհավորում էին միմյանց»։
Օգոստոսի 8-ին Վաշինգտոնում Հայաստանի և Ադրբեջանի ղեկավարներն ԱՄՆ-ի միջնորդությամբ հռչակագիր էին ստորագրել, որով նաև նախատեսվում է ստեղծել TRIPP (Trump Route for International Peace and Prosperity) տրանսպորտային երթուղի: Կողմերը նաև նախաստորագրել էին խաղաղության համաձայնագրի նախագիծ, որն օգոստոսի 11-ին հրապարակվել էր ՀՀ ԱԳՆ-ի կողմից: Փաստաթղթի համաձայն՝ կողմերը միմյանց նկատմամբ տարածքային պահանջներ չունեն և հետագայում նման պահանջներ չեն առաջադրելու:
