Ժուռնալիստների միությունը միջազգային կազմակերպություններին կոչ է արել դատապարտել ԶԼՄ-ների ներկայացուցիչների նկատմամբ գրանցված միջադեպերը։
Կոչ-ուղերձում նշվում է, որ Հայաստանում լրագրողների դեմ 2018թ. «թավշյա հեղափոխությունից» հետո մեկնարկած արշավը ոչ միայն շարունակվում է, այլև նոր դրսևորումներ է ստանում:
«Գործող իշխանությունն ակնհայտորեն անցել է լրագրողներին բացահայտ ահաբեկելու գործելակերպին: Վերջին շրջանում լրագրողների դեմ իշխանական պատգամավորների հարձակումները, այդ թվում՝ սոցիալական ցանցերում և իրենց հետ փոխկապակցված լրատվամիջոցների անվան տակ հանդես եկող կայքերում թիրախավորման դեպքերն այլ կերպ հնարավոր չէ բացատրել»,- ասվում է հայտարարության մեջ:
Միությունը հիշեցրել է ապրիլի 18-ին Ազգային ժողովում «Քաղաքացիական պայմանագիր» խմբակցության պատգամավոր Խաչատուր Սուքիասյանի կոպիտ վերաբերմունքը Factor.am-ի լրագրող Նարեկ Կիրակոսյանի նկատմամբ։
Լրագրողները շեշտել են, որ Ազգային ժողովի շենքում ցանկացած լրագրող ցանկացած պատգամավորի հարց տալու իրավունք ունի, և այդ հարցերին պատասխանելը պատգամավորի աշխատանքի մասն է:
Հայտարարության մեջ նաև նշվում է, որ իշխանությունները ցանկացած իրավիճակում քավության նոխազ են դարձնում լրագրողներին՝ ատելություն սերմանելով նրանց նկատմամբ:
Միությունն ադրադարձել է նաև Երևանում Արցախի ներկայացուցչության մոտ Արցախի Հանրապետության նախագահ Սամվել Շահրամանյանի դեմ բողոքի ակցիա իրականացնող խմբի անդամներն վարքագծին։
Հայաստանի ժուռնալիստների միությունը դիմել է գործընկեր կառույցներին՝ Ժուռնալիստների եվրոպական ֆեդերացիային (EFJ) և Ժուռնալիստների միջազգային ֆեդերացիային՝ (IFJ) նրանց տեղեկացնելով, որ առաջնային մանդատով օժտված ՀՀ օրենսդիր մարմնում ոչ միայն խոչընդոտվում է լրագրողների աշխատանքը, այլև նրանք խորհրդարանում աշխատում են կառավարող կուսակցության առանձին պատգամավորների ամենօրյա ուղիղ սպառնալիքների, վիրավորանքների ներքո։
