ՀՀ երեք նախկին նախագահների ներկայացուցիչներն արձագանքել են մարտի 26-ին ԱԺ-ում վարչապետ Նիկոլ Փաշինյանի կողմից հնչեցված հայտարարություններին։
«Հիշեք. նա կկծի, կլացի, քացի կտա, կգոռա ու կսպառնա, որ կբողոքի վերին ատյաններ, կանի արդեն պատկերացնելին ու դեռևս անպատկերացնելին: Բայց երբեք չի հրապարակի ղարաբաղյան կարգավորման՝ Մինսկի խմբի պաշտոնական պլաններն ու Հայաստանի պաշտոնական պատասխանները, այդ թվում՝ իր կողմից մերժված 2019 թվականի պլանը: Թեթև տարեք, դա հին պատուհասական ադաթ է»,- Facebook-ում գրել է ՀՀ առաջին նախագահ Լևոն Տեր-Պետրոսյանի մամուլի քարտուղար Արման Մուսինյանը:
Երկրորդ նախագահ Ռոբերտ Քոչարյանի գրասենյակի ղեկավար Բագրատ Միկոյանը Yerevan.Today կայքին ասել է, որ Փաշինյանի ելույթից պարզ է դառնում, որ վերջինս «բանավիճելու մանիակալ չբավարարված պահանջ ունի»։
«Լավագույն լուծումը մոտակա հոգեբուժարանում սանիտարների հետ բանավիճելն է: Իսկ ընդհանրապես, օղին դեղերի հետ չի կարելի խառնել»,- նշել է Միկոյանը։
ԱԺ «Պատիվ ունեմ» խմբակցության ղեկավար Հայկ Մամիջանյանը, մեկնաբանելով վարչապետի ելույթը, մեջբերել է ՀՀ երրորդ նախագահ Սերժ Սարգսյանի խոսքերը․ «Ես հիվանդ մարդկանց հետ գործ չունեմ»։
Մարտի 26-ին Փաշինյանը խորհրդարանում պահանջել էր, որ Հայաստանի երեք նախկին նախագահները կա՛մ ուղիղ եթերում բանավիճեն իր հետ Արցախյան հարցի կարգավորման շուրջ, կա՛մ դադարեցնեն հայտարարություններ անել այս թեմայով։ «Եթե բանավիճում եք, եկեք խոսենք։ Ես ձեզ հետ չեմ բանավիճի, ես ձեզ պատերով կտամ և այնտեղից ձեր քաղաքական դիակի մնացորդները դուրս կհանեն, երեքիդ էլ վերաբերվում է։ Հերիք է ներվերներիս հետ խաղաք։ Ես ձեզ ոտի տակ կտամ, ոչ թե ձեզ հետ կբանավիճեմ»,- ասել էր վարչապետը։
