Վարչապետ Նիկոլ Փաշինյանը հայտնել է Հայաստանի նոր Սահմանադրության ընդունման հանրաքվեի ժամկետների, ինչպես նաև Հայաստանում ԵՄ դիտորդական առաքելության ապագայի և ԵԱՀԿ Մինսկի խմբի հնարավոր լուծարման մասին։
Հանրային հեռուստաընկերությանը տված հարցազրույցում նա նշել է, որ նոր Սահմանադրության ընդունման հարցը ներքին քաղաքական օրակարգում է 2018-2020 թթ.-ից։
«Մենք առաջարկելու ենք մեր ժողովրդին ունենալ նոր Սահմանադրություն, և պլանավորում ենք նոր Սահմանադրության ընդունման այդ հանրաքվեն իրականացնել 2027 թվականին, չնայած՝ այդ էլ պիտի ասեմ, որ կան, այդ թվում՝ քաղաքական թիմում, ձայներ, կարծիքներ, թե ինչո՞ւ ենք հետաձգում այդ գործողությունը, գուցե դա պետք է անել 2026 թվականի հերթական խորհրդարանական ընտրությունների հետ զուգահեռ և համատեղ, որն ավելի օրակարգը կդարձնի կոնկրետ քաղաքական»,- նշել է Փաշինյանը:
Վարչապետը ևս մեկ անգամ ընդգծել է, որ դա Հայաստանի բացառապես ներքաղաքական օրակարգի հարցն է՝ ընդունելով, որ այն չի կարող չունենալ «տարածաշրջանային և միջազգային ազդեցություն»։
Մեկնաբանելով Հայաստանում ԵՄ դիտորդական առաքելության ապագան՝ Փաշինյանը նշել է, որ սահմանին երրորդ երկրների ուժեր չտեղակայելու մասին կետը ուժի մեջ կմտնի խաղաղության պայմանագրի ստորագրումից և վավերացումից հետո։
«Եկեք չմոռանանք, ինչ նպատակով ենք մենք Եվրամիության դիտորդներին հրավիրել՝ որպես խաղաղության և կայունության գործոն։ Եթե մենք այդ համաձայնագրի ստորագրման արդյունքում ստանում ենք մեր սահմաններին խաղաղության և կայունության ավելի ուժեղ, հուսալի գործոն, շատ անտրամաբանական կլիներ, եթե մենք երկարաժամկետ ինստիտուցիոնալ խաղաղությունը չնախընտրեինք և նախընտրեինք միջանկյալ գործոնը, որը շատ կարևոր գործոն է»,- ասել է նա։
Փաշինյանի խոսքով՝ նպատակն այն է, որ սահմանի երկայնքով լինի խաղաղություն և կայունություն: «Եվ երբ ստորագրվի խաղաղության համաձայնագիրը, մենք այլևս կունենանք ինստիտուցիոնալ խաղաղություն և կայունություն, և այդ պայմաններում Եվրամիության մեր հարգելի դիտորդներին կարող ենք կամ նեղություն չտալ կամ ավելի պակաս նեղություն տալ»,- ասել է նա։
Փաշինյանը պարզաբանել է, որ դա նշանակում է, որ Հայաստանն ու ԵՄ-ն պայմանավորվելու են դիտորդական առաքելության ապագայի, գործունեության ձևերի և մեթոդների շուրջ։ Վարչապետը հայտարարել է, որ համապատասխան որոշում դեռ չի կայացվել։
Նա կարծիք է հայտնել, որ երրորդ երկրների հետ Հայաստանի հարաբերությունները Երևանի ինքնիշխան հարաբերությունների հարցն են և կքննարկվեն ու կլուծվեն երկկողմ մակարդակով։
Պատասխանելով ԵԱՀԿ Մինսկի խմբի հնարավոր լուծարման մասին հարցին՝ Փաշինյանը հայտարարել է, որ այս հարցը քննարկման ենթակա է, քանի որ խաղաղության համատեքստում այս ձևաչափը, ըստ նրա, կորցնում է իր արդիականությունը։
«ԵԱՀԿ Մինսկի խմբի համանախագահությունը, եթե շատ ուղիղ ձևակերպենք՝ առանց սրբագրումների կամ առանց շպարի, նրա մասին է, որ Ադրբեջանի տարածքում կա կոնֆլիկտային իրավիճակ։ Եվ մենք ասում ենք՝ քանի որ ճանաչել ենք Ադրբեջանի տարածքային ամբողջականությունը և Ադրբեջանն էլ մեր տարածքային ամբողջականությունն է ճանաչել, մենք պատրաստ ենք արձանագրել և արձանագրում ենք, որ այդ կոնֆլիկտային իրավիճակը չկա»,- ասել է Փաշինյանը:
Ըստ նրա՝ հայկական կողմն ուզում է համոզվել, որ Ադրբեջանի նպատակադրումն այն չէ, որ սեփական տարածքում կոնֆլիկտային իրավիճակի հասցեագրումն ամփոփելով՝ կոնֆլիկտային իրավիճակ ստեղծի Հայաստանի Հանրապետության ինքնիշխան տարածքում:
«Սա կարևոր նրբություն է, բայց ԵԱՀԿ Մինսկի խումբը լուծարելը, դա քննարկելի և օրակարգային հարց է, և մենք ինքներս էլ կնախաձեռնենք առաջիկայում այդ հարցը քննարկելը։ Ժամկետը երբ, ոնց, ինչպես, նորից եմ ասում, ժամկետը նպատակ չէ»,- ասել է նա։
Մարտի 13-ին Ադրբեջանի ԱԳՆ-ն հայտարարել էր Երևանի և Բաքվի միջև խաղաղության պայմանագրի տեքստի շուրջ բանակցությունների ավարտի մասին՝ հայկական կողմի վերջին երկու կետերի վերաբերյալ Բաքվի առաջարկներն ընդունելուց հետո։ Հայաստանի ԱԳՆ-ն հաստատել էր լուրը և հայտարարել, որ Երևանը պատրաստ է Բաքվի հետ քննարկել համաձայնագրի ստորագրման ժամկետները և վայրը։
ՀՀ վարչապետ Նիկոլ Փաշինյանը մանրամասնել էր Երևանի և Բաքվի միջև խաղաղության պայմանագրի երկու կետերի բովանդակությունը և հաստատել, որ հարցերը վերաբերում էին հայ-ադրբեջանական սահմանին երրորդ երկրների ներկայացուցիչների բացակայության դրույթին, ինչպես նաև միջազգային դատարաններում հայցերը հետ կանչելու խնդրին։
Մարտի 13-ին Ադրբեջանի նախագահ Իլհամ Ալիևը հայտարարել էր, որ Բաքվի վստահության մակարդակը Հայաստանի նկատմամբ «մոտ է զրոյին»։ Նա նաև կրկնել էր Ադրբեջանի պահանջները Հայաստանի սահմանադրության մեջ փոփոխություններ մտցնելու և ԵԱՀԿ Մինսկի խմբի լուծարման վերաբերյալ։
Միաժամանակ, մարտի 16-ից Ադրբեջանը սկսել էր պարբերաբար հաղորդել հայկական կողմից իբր արձակված կրակոցների մասին։ ՀՀ պաշտպանության նախարարությունը հերքել էր այս բոլոր լուրերը։
Մանրամասները՝ տեսանյութում։
