Արցախի նախկին պետնախարար Արտակ Բեգլարյանն արձագանքել է ՀՀ խորհրդարանի նախագահ Ալեն Սիմոնյանի հայտարարություններին՝ նրա խոսքերն անվանելով «մանիպուլյացիա»։
Մարտի 15-ին Բեգլարյանն սպառնացել էր, որ ինքը և մի շարք այլ հայեր դատի կտան ՀՀ վարչապետ Նիկոլ Փաշինյանին միջազգային ատյաններում, եթե վերջինս հրաժարվի Բաքվի դեմ հայցից՝ վերջինիս մեղադրելով իրենց իրավունքները ոտնահարելու մեջ։ Սիմոնյանը մարտի 17-ին լրագրողներին ասել էր, որ Արցախի ժողովուրդն Ադրբեջանի իշխանությունների դեմ պայքարելու փոխարեն փորձում է պայքարել Հայաստանի իշխանությունների ու հարկատուների դեմ։
Բեգլարյանը հաստատել է, որ միջազգային ատյաններից դատի է տալու նրանց, ովքեր կորոշեն հետ վերցնել մի ամբողջ ժողովրդի իրավունքների պաշտպանության համար ներկայացված հայցերը։
«Հաշվի առեք, որ ես ստիպված եմ ՀՀ-ին դատի տալ, քանի որ դուք թաքնվում եք պետական մարմինների քողի տակ՝ ձեր բացարձակ սխալ ու հանցավոր որոշումները կայացնելիս: Ամեն դեպքում՝ վերջին հաշվով այդ դատական ակտերն ուղղված են լինելու այդ որոշումները կայացնող անձանց դեմ»,- ընդգծել է Արցախի նախկին պաշտոնյան։
Նա պարզաբանել է, որ ի տարբերություն Հայաստանի իշխանությունների՝ Ադրբեջանի դեմ դատական հայցեր ներկայացնելու հարցում վաղուց է օգնում անհատներին։ Բեգլարյանը հիշեցրել է, որ աջակցել է Հայաստանի լիազոր մարմիններին միջազգային ատյաններում Ադրբեջանի դեմ միջպետական բողոքների համար համոզիչ ապացույցներ հավաքելու հարցում։
«Կասե՞ք, թե այդ որ իրավունքով եք դուք փակում ձեր իսկ հարկատուների ու ընտրողների հավաքական ու անհատական իրավունքների պաշտպանության բոլոր հնարավորությունները: Նայեք հայելու մեջ և գուցե կհասկանաք, թե ում պետք է ուղղեք ինձ հղած Ձեր մեղադրանք-հարցադրումները»,- դիմել է Արցախի նախկին պետնախարարը Հայաստանի իշխանությունների ներկայացուցիչներին։
Նա վստահություն է հայտնել, որ քաղաքացիներն իրավունք ունեն դատարանում պաշտպանել իրենց իրավունքներն իշխանությունների անօրինական որոշումներից։
«Ուզում եք ասել, որ պետական պաշտոնյաներն ինչ կուզեն կանե՞ն, իսկ քաղաքացիներն իրավունք չունե՞ն դատարանով իրենց իրավունքները պաշտպանել՝ ընդդեմ ապօրինի որոշումների: Լո՞ւրջ, պարոնա՛յք, փաստորեն, ՀՀ պետական մարմինների հանցավոր գործողությունների դեմ պայքարող բոլոր անձինք քաղաքացու ձեր մոդելից շա՞տ են շեղվել»,- նշել է Բեգլարյանը։
Նա զգուշացրել է, որ եթե Հայաստանը հրաժարվի միջազգային ատյաններում ներկայացրած բողոքներից, ապա կբախվի լայնածավալ դատական հայցերի, որոնք կապացուցեն իշխանությունների որոշումների հանցավոր բնույթը։
«Սեփական քաղաքացիների ու հարկատուների դեմ հոխորտալու և թշնամու հրահանգներն իրականացնելու փոխարեն ուղղակի կատարե՛ք ձեր ստանձնած պարտավորությունները և ապահովե՛ք մեր իրավունքների պաշտպանությունը, այդ թվում՝ միջազգային ամենաքաղաքակիրթ մեխանիզմներով»,- հավելել է արցախցի նախկին պաշտոնյան։
Բեգլարյանը կարծում է, որ կայուն և երկարաժամկետ խաղաղություն կարող է լինել միայն մարդու իրավունքների խախտումների վերացումից հետո։
«Թո՛ղ Ձեզ չթվա, թե ինձնից կամ որևէ տառապած արցախցուց շատ եք փափագում խաղաղության հասնել: Ուզո՞ւմ եք իրական ու կայուն խաղաղություն լինի, ուրեմն ձգտե՛ք արդար ու արժանապատիվ լուծումների, այդ թվում՝ տեղի ունեցած մարդու իրավունքների խախտումների քննման ու հետևանքների վերացման տեսքով: Երբ արդար, արդյունավետ ու համարժեք լուծումներ տաք գանգատներում ներկայացված հիմնախնդիրներին ու խախտումներին, միայն այդ ժամանակ կարող եք հրաժարվել այդ գանգատներից»,- եզրափակել է Բեգլարյանը։
