Դիվանագետների համահայկական խորհուրդը հանդես է եկել հայ-ադրբեջանական խաղաղության պայմանագրի նախապատրաստման և համաձայնեցման գործընթացի կոշտ քննադատությամբ։
Խորհրդի պաշտոնական էջում տեղադրված հայտարարության մեջ նշվում է, որ այս գործընթացն իրենից ներկայացնում է ոչ թե իրական բանակցություններ, այլ դրանց իմիտացիա, որի նպատակը դիվանագիտական հաջողության պատրանք ստեղծելն է: Իրականում՝ խոսքը Հայաստանի կողմից մի շարք միակողմանի զիջումների մասին է։
Խորհուդը հայտարարել է, որ Հայաստանի արտաքին գործերի նախարարությունը համոզիչ հիմնավորումներ չի ներկայացրել Ադրբեջանի փոխզիջումների կամ մերժված ձևակերպումների վերաբերյալ, ինչպես նաև առաջընթաց չի գրանցել այնպիսի առանցքային հարցերի շուրջ, ինչպիսիք են օկուպացված տարածքներից ադրբեջանական զորքերի դուրսբերումը, հայ ռազմագերիների ազատ արձակումը և Արցախի ժողովրդի իրավունքների պաշտպանությունը:
«Չնայած պայմանագրի ստորագրման պատրաստակամության մասին Հայաստանի իշխանությունների հայտարարություններին՝ դրա բովանդակությունը գաղտնի է մնում, ինչն անվստահություն է առաջացնում հանրության շրջանում»,- ասվում է հայտարարության մեջ:
Ըստ խորհրդի՝ ադրբեջանական կողմը շարունակում է նոր պահանջներ ներկայացնել՝ պնդելով, որ որևէ վերջնական որոշում վաղաժամ է:
Դիվանագիտների խորհուրդն զգուշացրել է, որ նման փաստաթուղթը խաղաղություն չի բերելու, այլ, ընդհակառակը, կուժեղացնի ճնշումը Հայաստանի վրա՝ ստեղծելով տարածքային նոր նկրտումների և հնարավոր պատերազմի վտանգներ:
Արդար և կայուն խաղաղության հասնելու համար խորհուրդը պնդում է Հայաստանի տարածքային ամբողջականության վերականգնումը, շրջափակման վերացումը, Արցախի ժողովրդի իրավունքների պաշտպանությունը և բոլոր գերիների ազատ արձակումը:
Խորհուրդը նաև պահանջել է պայմանագրի տեքստի հրապարակում՝ բաց քննարկման համար: Խորհրդի կարծիքով՝ Նիկոլ Փաշինյանի վարչակազմը չունի Հայաստանի ազգային շահերին սպառնացող որոշումներ կայացնելու մանդատ, և ստորագրվող փաստաթուղթը չի համապատասխանում տարածաշրջանում կայուն խաղաղության նպատակներին:
Դիվանագետների համահայկական խորհուրդը հասարակական կազմակերպություն է, որը միավորում է նախկին հայ դիվանագետներին և պետական գործիչներին, որոնք ձգտում են նպաստել Հայաստանի արտաքին քաղաքական շահերին և ամրապնդել կապերը միջազգային գործընկերների հետ: 2024 թվականի հոկտեմբերին խորհուրդը համագործակցության հուշագիր էր ստորագրել ՌԴ ԱԳՆ Մոսկվայի Միջազգային հարաբերությունների պետական ինստիտուտի հետ՝ կարևորելով Հայաստանի և Ռուսաստանի միջև գիտական շփումների զարգացումը։
Մարտի 13-ին Ադրբեջանի արտգործնախարար Ջեյհուն Բայրամովը հայտարարել էր, որ Երևանի և Բաքվի միջև խաղաղության պայմանագրի տեքստի շուրջ բանակցությունների գործընթացն ավարտվել է։ Նրա խոսքով՝ հայկական կողմը հայտնել է, որ ընդունել է վերջին երկու կետերը, որոնք մինչ այժմ բաց էին։ Հայաստանի ԱԳՆ-ն հաստատել էր նախագծի հաստատման ավարտը և հայտարարել, որ Երևանը պատրաստ է Բաքվի հետ սկսել խորհրդակցություններ համաձայնագրի ստորագրման ժամկետների և վայրի շուրջ։
