Ռուսաստանի ԱԳՆ ներկայացուցիչ Մարիա Զախարովան Եվրամիությանը և Հայաստանին մեղադրել է «Բաքվի թիկունքում» եվրոպացի դիտորդների մանդատը երկարաձգելու մեջ։
«Եթե ԵՄ առաքելությունն այդքան վճռական է տրամադրված տարածաշրջանային կայունությանը նպաստելու և Հայաստանի և Ադրբեջանի միջև վստահություն ստեղծելու համար, ապա ինչո՞ւ այդ ժամանակ իր մանդատը երկարացնելու որոշումը և, սկզբունքորեն, դրա տեղակայումը հիմնականում ընդունվեց Բաքվի թիկունքում»,- հարցրել է նա։
Զախարովան կարծում է, որ Ադրբեջանի իշխանությունները «կենսականորեն շահագրգռված են կայունությամբ», ուստի նման որոշումներ կայացնելիս պետք է հաշվի առնել նրանց կարծիքը։
2023 թվականի փետրվարի 20-ին Եվրամիությունը Միասնական անվտանգության և պաշտպանության քաղաքականության շրջանակներում մեկնարկել էր քաղաքացիական առաքելությունը Հայաստանում (EUMA) և ունի երկամյա մանդատ։ 2023 թվականի դեկտեմբերին ԵՄ-ն որոշել էր Հայաստանում իր դիտորդների թիվը 138-ից հասցնել 209-ի: ԵՄ առաքելության օպերատիվ շտաբը գտնվում է Եղեգնաձորում։ Առաքելության նպատակն է կայունացնել իրավիճակը Հայաստանի սահմանամերձ շրջաններում, ամրապնդել հակամարտություններից տուժած շրջաններում մարդկանց վստահությունն ու անվտանգությունը և ԵՄ աջակցությամբ ապահովել Հայաստանի և Ադրբեջանի միջև հարաբերությունների կարգավորմանը նպաստող պայմաններ։
Նոյեմբերի 23-ին ՀՀ վարչապետ Նիկոլ Փաշինյանը հայտարարել էր, որ Ադրբեջանին առաջարկել է ԵՄ դիտորդներին հանել սահմանազատված հատվածներից։ Սեպտեմբերի 1-ին Ադրբեջանի նախագահի օգնական Հիքմեթ Հաջիևը հայտարարել էր, որ Երևանի և Բաքվի միջև սահմանազատման հանձնաժողովի վերաբերյալ պայմանավորվածությունը «բավարար է» ԵՄ դիտորդական առաքելությունը Հայաստանից դուրս բերելու համար։ ՀՀ ԱԺ նախագահ Ալեն Սիմոնյանը հոկտեմբերի 23-ին հույս էր հայտնել, որ ԵՄ դիտորդները կմնան Հայաստանում այնքան ժամանակ, քանի դեռ Ադրբեջանի հետ խաղաղության պայմանագիր չի կնքվել։ Հոկտեմբերի 23-ին Միրզոյանը հայտնել էր, որ Բրյուսելը դիտարկում է Հայաստանում ԵՄ դիտորդական առաքելության ժամկետը երկարաձգելու հարցը։
