Facebook-ի ուղիղ եթերում փաստաբան Արսեն Բաբայանը մանրամասներ է պատմել իր ձերբակալության մասին։
Այսօր ավելի վաղ ոստիկանությունը ձերբակալել, այնուհետ ազատ էր արձակել Բաբայանին և ընկերներին։ Ըստ ԶԼՄ-ների՝ ձերբակալվածները գտնվում էին Վանեցյանին պատկանող մեքենայում։
Փաստաբանը նշել է, որ չորրորդ անգամ են նույն ավտոմեքենայում գտնվող նույն մարդկանց կասկածում ապօրինի զենք կրելու մեջ և ձերբակալում։
«Չորրորդ անգամ ձերբակալվում են իմ ընկերները, որոնց հետ այս անգամ և ես էի, իսկ ես էի, որովհետև ես գիտեի, որ պիտի ձերբակալեին։ Չորս անգամ արդեն ձերբակալվում են, տարվում են, վեց ժամ պահում են ոստիկանության բաժիններում։ Մեքենան վերցնում են, ապօրինաբար երեք օր, չորս օր պահում են և հետո նոր անձանց ազատ են արձակում»,- մանրամասնել է Բաբայանը։
Նրա խոսքով՝ ոստիկանական գործողության թիրախը մասնավոր պահնորդական ընկերության աշխատակիցներն էին, որոնք սպասարկում են ԱԱԾ նախկին պետ Արթուր Վանեցյանին։
«Օրենքով նախատեսված ծառայությունից ենք մենք օգտվում, մի փորձեք ապօրինի, հանցավոր եղանակներով մեզ այդ ծառայությունից օգտվելը արգելել, չի ստացվելու։ Խնդրանքները, որ թող մեքենա հետևից չգնա, չէ, պիտի գնա, որովհետև դա օրենքով նախատեսված գործողություն է, հետևաբար ակնկալում եմ, որ առնվազն ներքին գործերի նախարարը այս առնչությամբ պիտի տա բացատրություն»,- ասել է նա։
Փաստաբանն ընդգծել է, որ անվտանգության աշխատակիցները լիցենզավորված կազմակերպության աշխատակիցներ են, ունեն զենք կրելու թույլտվություն, և նրանց մասին տեղեկությունները հասանելի են ոստիկանության համապատասխան բաժիններում։ Ըստ նրա՝ ոստիկանության գործողությունները քաղաքական նպատակ ունեն։
