ՀՀ արտգործնախարար Արարատ Միրզոյանը չի մասնակցի հունիսի 21-ին Ղազախստանի մայրաքաղաք Ալմաթիում կայանալիք ՀԱՊԿ անդամ երկրների արտաքին գործերի նախարարների խորհրդի նիստին, Armenia Today-ին տեղեկացրել է ՀՀ ԱԳՆ մամուլի խոսնակ Անի Բադալյանը:
ՀՀ ԱԳՆ հայտնել է, որ հունիսի 20-ին Միրզոյանն աշխատանքային այցով կգտնվի Վիլնյուսում, որտեղ կայանալու են նախարարի հանդիպումները Լիտվայի բարձրաստիճան պաշտոնյաների, այդ թվում՝ ԱԳ նախարար Գաբրիելիուս Լանդսբերգիսի հետ:
Հունիսի 13-ին ՀՀ վարչապետ Նիկոլ Փաշինյանը խորհրդարանում 2023 թվականի բյուջեի կատարման քննարկման ժամանակ հայտարարել էր, որ Երևանի հաջորդ «տրամաբանական քայլը» լինելու է ՀԱՊԿ-ից դուրս գալը։
Մայիսի 8-ին Բադալյանը Armenia Today-ին հայտնել էր, որ Հայաստանը 2024 թվականին կդադարի մասնակցել ՀԱՊԿ-ի գործունեության ֆինանսավորմանը։
Փետրվարի 22-ին ՀՀ վարչապետ Նիկոլ Փաշինյանը France 24 հեռուստաալիքին տված հարցազրույցում ասել էր, որ Հայաստանը սառեցրել է իր մասնակցությունը ՀԱՊԿ-ին։
Իր հերթին՝ ՀԱՊԿ-ը հայտարարել էր, որ կազմակերպությունը Հայաստանից պաշտոնական հաղորդագրություն չի ստացել իր մասնակցությունը կասեցնելու մասին։ ՌԴ ԱԳՆ-ն փետրվարի 23-ին ՀԱՊԿ-ի մասին Փաշինյանի խոսքերից հետո Երևանից պարզաբանում էր ակնկալել, իսկ մարտի 6-ին հայտարարել, որ ՌԴ-ն հայկական կողմին Երևանի համար խնդրահարույց հարցերի շուրջ խորհրդակցությունների է հրավիրել։ Փաշինյանը մարտի 12-ին ասել էր, որ Հայաստանը դուրս կգա ՀԱՊԿ-ից, եթե իր բարձրացրած հարցերի պատասխանները չստանա։
