«Տավուշը հանուն հայրենիքի» շարժման առաջնորդ Բագրատ արքեպիսկոպոս Գալստանյանը մայիսի 23-ին ՏՏ ոլորտի մասնագետների հետ հանդիպման ժամանակ հայտարարել է, որ քաղաքական պայքարի ասպարեզում հայտնվելն իր համար անընդունելի է, բայց դա «պարտադրված» վարքագիծ է։
«Ինձ համար անձնապես անընդունելի է, որ արքեպիսկոպոս մարդը հայտնվի հրապարակում և այնպիսի վարքագիծ ունենա, ինչպիսին ես ունեմ այսօր․ ոմանց համար լավ, ոմանց համար՝ վատ, կարևոր չէ։ Բայց սա պարտադրված է։ Սա ուղղակի աղաղակ է և ճիչ»,- նշել է նա։
Գալստանյանի խոսքով՝ իրեն ստիպել է այդ քայլին գնալ նաև այն գիտակցումը, որ մարդիկ անցած 4 տարիների ընթացքում (2020 թվականի պատերազմից հետո – խմբ.) հուսահատության, անզորության մեջ են, և դա տեղի է ունենում իշխանությունների «ստի» ֆոնին։
Արքեպիսկոպոսի խոսքով՝ սահմանազատման և սահմանագծման գործընթացը դարձել է իշխանությունների ստի ևս մեկ վկայությունը։
«Սահմանազատման և սահմանագծման գործընթացում ուղղակի միակողմանիորեն, թշնամու սպառնալիքի ներքո, առանց որևէ օրենք հարգելու՝ կլինի դա միջազգային, թե հայաստանյան, առանց մեր երկրի պետական Սահմանադրությունը հարգելու, ուղղակի ուժի սպառնալիքի ներքո, վախի ազդեցության տակ մարդը և մարդիկ որոշումներ են կայացրել, որոնք մարդկանց կյանքը ողբերգություն են դարձրել»,- շեշտել է նա։
Տավուշի սահմանամերձ գյուղերի բնակիչները բողոքի ակցիաներ էին սկսել ՀՀ ԱԳՆ-ի՝ ապրիլի 19-ին հայտարարությունից հետո, որով Հայաստանն ու Ադրբեջանը պայմանավորվել են սահմանազատման գործընթացն սկսել Տավուշից։ Բնակիչները հայտարարել էին, որ դեմ եմ Հայաստանի զիջումներին։ Մայիսի 4-ին «Տավուշը հանուն հայրենիքի» շարժումը երթ էր սկսել դեպի Երևան, ուր հասել էին մայիսի 9-ին և նույն օրը հանրահավաք անցկացրել՝ հայտարարելով, որ պատրաստվում են ԱԺ-ում վարչապետ Նիկոլ Փաշինյանին անվստահության գործընթաց սկսել։ Սրբազանը հանրահավաքի ժամանակ կոչ էր արել մայիսի 13-ի առավոտից անհնազանդության ակցիաներ սկսել։ Երևանն ու Բաքուն մայիսի 15-ին ստորագրել էին Տավուշում սահմանի սահմանազատման արձանագրությունը։
Մայիսի 16-ին Կիրանցի բնակիչները, ի նշան բողոքի, երկրորդ անգամ փակել էին Հայաստան-Վրաստան միջպետական ճանապարհը։
