Հունվարի 30-ին քաղաքապետարանում հանրային լսումներ են անցկացրել և քննարկել Օղակաձև զբոսայգու վերակառուցման նախագիծը, որով նախատեսում են ապամոնտաժել Երևանի «Արարատ» ակումբի թենիսի կորտերը։
Միակ բանը, որ այգում իր տեղում է և տրամաբանության մեջ է, թենիսի կորտերն են, լսումների ժամանակ հայտարարել է Երևանի ավագանու նախկին անդամ Քրիստինա Վարդանյանը։
«Երբ խոսում ենք հանրային շահի մասին, պետք է հասկանանք, որ այսօր Երևանում ընդհանուր օգտագործման կանաչ գոտիները նորմատիվից 5 անգամ ավելի պակաս են։ Եվ ամեն մի քառակուսի մետր կանաչ տարածքը կարևոր նշանակություն ունի երևանցիների առողջությունն ապահովելու համար։ Ուստի որևէ պարագայում Օղակաձև զբոսայգու մեկ շինությունը փոխել մեկ այլ շինությունով՝ անընդունելի է հենց առողջության տեսանկյունից։ Ու միակ բանը, որ այգում իր տեղում է, կորտերն են, որոնք պետք է մնան իրենց տեղում՝ որպես խորհրդանիշ, որպես մարզվելու հնարավորություն»,- ընդգծել է Վարդանյանը։
Երևանի ավագանու անդամ, նախկին քաղաքապետ Հայկ Մարությանը «խայտառակություն» է անվանել կորտերի տարածքը երկու ծառի համար այգուց հանելը։
«Օղակաձև այգին իրենից ներկայացնում է վեց հատված և երբեք չի կարելի դրանք առանձնացնել։ Իրենք մի ամբողջություն են, չի կարելի յուրաքանչյուր հատվածը դիտարկել առանձին-առանձին, սա հատուկ արված մի այգի է, որը քաղաքի պաշտպանիչ օղակն է հանդիսանում, մեր թոքերը։ Ցավում եմ, որ տասնյակ տարիների ընթացքում այս թոքերը թոքախտով են հիվանդացել և քաղցկեղի են մոտենում։ Այնուամենայնիվ, մենք հասել ենք մի կետի, երբ այլևս չի կարելի թույլ տալ, որ թեկուզ մի քառակուսի մետր ավել այդ կանաչ տարածքները խլեն երևանցուց։ Ես չգիտեմ, թե այնտեղ վերջնական ինչ է լինելու, բայց ինչ ես տեսել եմ, խայտառակություն է։ Տարածքը տալ, որովհետև երկու ծառ են տնկելու 50, 90 տարում, աբսուրդ է։ Այդ տարիները մեզնից են կորելու։ Մենք խնդիր չունենք, եթե պետք լինի, փողոց էլ դուրս կգանք, բուլդոզերների տակ էլ կպառկենք, միակ բանը, որ մեզ մոտ փոխվել է, տարիքն է, մի քիչ ծերացել ենք»,- հավելել է Մարությանը։
Ճարտարապետ, նկարիչ Կարեն Դոլուխանյանն ընդգծել է, որ սա «ունիկալ իրավիճակ» է, որտեղ երկու կողմ չկա։ Չկան մարդիկ, ովքեր կասեն, որ իրենց այդ կորտերը պետք չեն։
«Այս հարցում բացարձակ հանրային պահանջ չկա, և խելքին մոտ պարզաբանում էլ չկա։ Իսկ Օղակաձև այգին պատահական չի ստեղծվել, մարդիկ զբոսնում են, մեկը սիրում է շախմատ խաղալ, մյուսը՝ թենիս, մյուսն աղոթել կամ երաժշտություն լսել, բոլոր մարդկանց տարբեր պահանջները բավարարվում են, կորտերը քայլելուն չեն խանգարում, խնդրեմ, քայլեք։ Սկզբում կորտերն են ստեղծվել, հետո՝ այգին։ Այնպես որ, բոլոր խոսակցությունները տրամաբանության մասին պարզապես անհասկանալի և ծիծաղելի են»,- ասել է ճարտարապետը։
Հայաստանի թենիսի ֆեդերացիայի ներկայացուցիչ, միջազգային կարգի մրցավար Հրանտ Սարկիսովը տեղեկացրել է, որ մինչև հիմա համայնքի ներկայացուցիչներից որևէ մեկը չի եկել և չի խոսել իրենց հետ։
«Նախ՝ պետք է արձանագրեմ, որ Թենիսի ֆեդերացիան երկու կարևոր նամակ է ստացել Միջազգային և Եվրոպայի թենիսի ֆեդերացիաներից։ Նրանք հստակ արձանագրել են թենիսի կարևորությունը և հիշատակել են, թե քանի տասնյակ տարիներ են այդ կորտերն սպասարկում։ Ինձ ընդհանրապես հետաքրքիր չեն համայնք ու սեփականատեր փոխհարաբերությունները։ Երբ մենք ասում ենք թենիսի կորտեր տեղափոխել, սա մի հստակ բան է նշանակում, որ թենիսի կորտերը քանդվում են և տեղը նորն են կառուցում»,- ընդգծել է նա։
Կենտրոն վարչական շրջանի նախկին ղեկավար Վիկտոր Մնացականյանի խոսքով՝ քաղաքային իշխանության լսումներին չգալն անարգանք է երևանցիների նկատմամբ։
«Ենթադրում էի, որ գոնե այս անգամ քաղաքային իշխանություններից որևէ մեկը ներկա կլիներ։ Բայց, կարծում եմ, սա հերթական՝ չասեմ ապտակն է, բայց անարգանք է երևանցիների հանդեպ, որ Երևանի համար շատ կենսական կարևորություն ունեցող հարցի քննարկմանն իրենք ներկա չեն։ Մենք այստեղ շատ հարցեր ենք քննարկում, բայց մասնակցային կառավարման մոդելի բացարձակ բացակայություն է և անարգանք։ Այստեղ անգամ ներկա չեն պրոֆիլային մի քանի վարչություններ, օրինակ՝ բնապահպանության, քաղշին, բարեկարգման, հատուկ ծրագրերի, ներդրումների, էլ չեմ ասում իշխող թիմի ավագանու ներկյացուցիչները, նաև Կենտրոնի թաղապետարանից, ԿԳՄՍ նախարարությունից»,- ընդգծել է Մնացականյանը։
Նա նաև հավելել է, որ այս քայլով իրենք հիշեցնում են, որ ընդամենը 9 տոկոս քաղաքական քվե ունեցող կուսակցություն և իշխանություն են․ «Եթե ինչ-որ ձև իրենց ձեռքն ընկել է այդ կնիքն ու աթոռը, իրենք պետք է նվազագույն հարգանք ունենային երևանցիների հանդեպ։ Անգամ եթե երևանցիների 10 տոկոսն ասոցացնում է թենիսի կորտերը մեր ինքնության հետ, իրենք պետք է դադարեցնեին այդ բոլոր քննարկումները։ Նրանք նաև բարոյական լեգիտիմություն չունեն նման չարաբաստիկ «բարեկարգումներ» անելու համար»։
Հունվարի 15-ին Երևանի քաղաքապետ Տիգրան Ավինյանը մեկնաբանել էր Օղակաձև այգու վերակառուցման, «Արարատ» թենիսի ակումբի քանդման մասին քննարկումները և մատնանշել, որ վերակառուցման ծրագիրը քաղաքային իշխանությունների ուշադրության կենտրոնում է լինելու, ակումբը գործելու է մեկ այլ վայրում, ավելի լավ պայմաններում: Քաղաքապետարանի մամուլի խոսնակ Հայկ Կոստանյանն էլ լրագրողների հետ ճեպազրույցում նշել էր, որ Օղակաձև զբոսայգու 4-րդ հատվածը որպես հանրային տարածք կծառայի։
