ՀՅԴ Կանադայի Հայ դատի հանձնախումբը հայտնել է, որ Կանադան կարող է չեղարկել Թուրքիայի նկատմամբ սահմանված ռազմական արտադրանքի վաճառքի էմբարգոն։ Կոմիտեն պարզաբանել է, որ այս քայլը կարող է ձեռնարկվել Շվեդիայի՝ ՆԱՏՕ-ին անդամակցելու գործարքի շրջանակում։
Հաշվի առնելով թուրքական նախկին զեղծարարություններն ու զենքի ձեռքբերման կանոնների խախտումները, ինչպես նաև Թուրքիայի կողմից ՀՀ տարածքային ամբողջականության ու ինքնիշխանության հանդեպ սպառնալիքները՝ Հայ դատի հանձնախումբը Կանադայի կառավարությանը կոչ է անում ցուցաբերել առավելագույն զգուշություն և առաջնահերթություն տալ տարածաշրջանային կայունությանը, խաղաղությանը և մարդու իրավունքներին:
«Կանադան չպետք է մեղսակից լինի թուրք-ադրբեջանական ռազմական հանցագործություններին` նպաստելով նրանց ռազմական զինանոցների ընդլայնմանը»,- ասված է հայտարարության մեջ:
Կոմիտեն ավելացրել է, որ խարդախ մտադրություններ ունեցող պետություններին զենքի վաճառքը խախտում է Կանադայի զենքի արտահանման կանոնները՝ զգալի վտանգ ներկայացնելով տարածաշրջանային կայունությանը։ ՀՅԴ-ն հիշեցրել է նախկինում բացահայտված տեխնոլոգիայի փոխանցումը Թուրքիայից Ադրբեջան, որով Կանադան արտադրում է «Բայրակթար» անօդաչու թռչող սարքերի մասեր:
«Թուրքիայի նկատմաբ կիրառվող զենքի էմբարգոյի վերացումը հատկապես վտանգավոր է կանադա-թուրքական ռազմական առևտրի վերջին սկանդալային բացահայտումներից հետո, երբ 2019թ․ պաշտոնական Օտտավան թույլատրել էր անօդաչուներում կիրառվող L3Harris/WESCAM տեխնոլոգիաների վաճառքը Անկարային, ինչը հանդիսանում էր «Բայրակթար» անօդաչուների մրցունակությունն ապահովող առանցքային դետալներից մեկը։ Հետագա հետաքննությունն ապացուցել էր այդ տեխնոլոգիաների փոխանցումն Ադրբեջանին, ինչն արգելված էր»,- նշել է կոմիտեն։
Բացի այդ, ըստ հայտարարության, հայտնաբերվել են նաև այլ խախտումներ։ Մասնավորապես, կանադական տեխնոլոգիան, համապատասխան թուրքական դիմումի, ենթակա էր կիրառման ոչ թե հարձակողական, այլ հետախուզական անօդաչուների համար։
«Պետական այս հետաքննությունից հետո կանադական կողմը Հայ դատի Կանադայի հանձնախմբի աշխատանքների արդյունքում Թուրքիայի նկատմամբ կիրառեց ռազմական արտադրանքի վաճառքի էմբարգո»,- ասված է հայտարարության մեջ։
2021 թվականի ապրիլին Կանադայի իշխանությունները չեղյալ էին համարել կանադական զենքի և տեխնոլոգիաների Թուրքիա արտահանման համար նախկինում տրված թույլտվությունները, քանի որ նրանք ստացել էին Լեռնային Ղարաբաղի հակամարտությունում դրանց կիրառման ապացույցներ։
