Երևանի ավագանու ընտրական ցուցակում ընդգրկված «Քաղաքացիական պայմանագիր» կուսակցության՝ 3 և «Մայր Հայաստան» դաշինքի՝ 2 անդամներ ինքնաբացարկի դիմումներ են ներկայացրել, հայտնում է ԿԸՀ-ն։
Նշվում է, որ Երևանի ավագանու «Քաղաքացիական պայմանագիր» խմբակցության անդամներ Կամսար Բաբինյանը, Հակոբ Բալայանը, Արամ Ազատյանը ինքնաբացարկի դիմումներ են ներկայացրել, լիազորությունները վաղաժամկետ դադարած ավագանու անդամների մանդատները տրվել է կուսակցության ընտրական ցուցակի հերթական հաջորդ թեկնածուներ Արման Բարխուդարյանին, Հեղինե Ոսկանյանին, Զինա Չալիկյանին։
Ինքնաբացարկի դիմումներ են ներկայացրել նաև Երևանի ավագանու «Մայր Հայաստան» խմբակցության անդամներ Ադրինե Ավագյանը և Դուստրիկ Մխիթարյանը, լիազորությունները վաղաժամկետ դադարած ավագանու անդամների մանդատները տրվել է «Մայր Հայաստան» կուսակցությունների դաշինքի ընտրական ցուցակի հերթական հաջորդ թեկնածուներ՝ Արմեն Քոչարյանին, Գրիգոր Իսկանդարյանին։
Սեպտեմբերի 17-ին մայրաքաղաք Երևանում տեղի էին ունեցել ավագանու 2023 թվականի ընտրություններ։ Կենտրոնական ընտրական հանձնաժողովը սեպտեմբերի 24-ի արտահերթ նիստում ամփոփել էր Երևանի ավագանու ընտրությունների վերջնական արդյունքները՝ համաձայն որոնց անցողիկ շեմը հաղթահարել էին հետևյալ ուժերը՝ ՔՊ՝ 24 մանդատ, «Ազգային առաջընթաց»՝ 14 մանդատ, «Մայր Հայաստան» դաշինք՝ 12 մանդատ, «Հանրապետություն»՝ 8 մանդատ, իսկ «Հանրային ձայն»՝ 7 մանդատ։
Հոկտեմբերի 10-ին՝ ավագանու ընտրություններից հետո առաջին նիստում, Երևանի ավագանին քաղաքապետ էր ընտրել «Քաղաքացիական պայմանագիր» կուսակցության թեկնածու Տիգրան Ավինյանին։
