Հայաստանին օգնության փաթեթը Հավաքական անվտանգության պայմանագրի կազմակերպության «օրակարգում է», ասել է ՀԱՊԿ քարտուղարությունը Armenia Today-ի հարցմանն ի պատասխան։ Կազմակերպությունից ընդգծել են, որ փաթեթը միայն դիտորդական առաքելություն ուղարկելու հարցի մասին չէ, սակայն այլ մանրամասներ չեն հայտնել։ Ավելի վաղ ՀԱՊԿ-ում դա բացատրել էին փաստաթղթի փակ բնույթով։
Միևնույն ժամանակ, ՀԱՊԿ-ը չի մեկնաբանել ՀՀ վարչապետ Նիկոլ Փաշինյանի հայտարարած դիտորդական առաքելության 30 մասնակիցների թիվը, որոնք կազմակերպությունը, ըստ նրա, պատրաստ է ուղարկել Հայաստան՝ հանրապետության վրա Ադրբեջանի հարձակման դեպքում։ ՀԱՊԿ-ը չի պատասխանել նաև Armenia Today-ի հարցին, թե ընդհանրապես քանի դիտորդ է պատրաստ ուղարկել Հայաստան և ինչ պայմաններով։ Կազմակերպությունը պարզաբանել է, որ «կոռեկտ չի համարում ՀԱՊԿ Հավաքական անվտանգության խորհրդի անդամ Փաշինյանի հայտարարությունները մեկնաբանելու հարց (Armenia Today) բարձրացնելը»։
Փաշինյանը 2022 թվականի նոյեմբերի 23-ին Երևանում կայացած ՀԱՊԿ ղեկավարների գագաթնաժողովում հայտարարել էր, որ ՀԱՊԿ երկրների ղեկավարները երկու որոշումների նախագծերի շուրջ կոնսենսուսի չեն եկել։ Նա ասել էր, որ Հայաստանին օգնություն ցուցաբերելու մասին հռչակագիր և հայտարարություն չի ստորագրել՝ կազմակերպության կողմից Հայաստանի դեմ Բաքվի ագրեսիային քաղաքական գնահատական տալուց հրաժարվելու պատճառով։
Այս տարվա մայիսի 25-ին Փաշինյանը նշել էր, թե ՀԱՊԿ-ը քանի դիտորդ է պատրաստ ուղարկել, եթե Ադրբեջանը հարձակվի Հայաստանի վրա։ «ՀՀ-ի վրա Ադրբեջանի պարբերաբար հարձակման ֆոնին, միջազգային հանրության հետ բանակցություններում, Բաքվի ներկայացուցիչներն ասում են, որ Հայաստանը չի ճանաչում մեր տարածքային ամբողջականությունը և մեզ մեղադրում են հարձակման մեջ։ Ենթադրենք, որ մենք չենք ճանաչում Ադրբեջանի տարածքային ամբողջականությունը, և եթե նա հարձակվի մեզ վրա, ապա ՀԱՊԿ-ը կգա պաշտպանության։ ՀԱՊԿ-ն ասում է, որ այնտեղ կլինի և կուղարկի 30 «ուժեղ դիտորդներ»»,- մանրամասնել էր Փաշինյանը։
ՀՀ վարչապետը նաև հայտնել էր, թե որ դեպքում Հայաստանը դուրս կգա ՀԱՊԿ-ից։ «Հայաստանը դե յուրե կորոշի դուրս գալ ՀԱՊԿ-ից, եթե արձանագրի, որ ՀԱՊԿ-ն ինքը լքում է Հայաստանը՝ մեր երկրի հանդեպ ստանձնած պարտավորությունները չկատարելու առումով»,- ասել էր նա։
