«Լուսավոր Հայաստան» կուսակցությունը դեկտեմբերի 23-ին կգումարի կուսակցության կառավարման խորհրդի նիստ և կորոշի «Լույս» խմբակցության ղեկավար Դավիթ Խաժակյանի՝ Երևանի ավագանիում հետագա գործունեության ձևաչափը։ Այս մասին այսօր՝ դեկտեմբերի 21-ին, լրագրողների հետ զրույցում ասել է Դավիթ Խաժակյանը:
Դավիթ Խաժակյանը նշել է, որ այս հարցի շուրջ իր և կուսակցության կարծիքը եղել է նույնական և երկուշաբթի օրը կոնսենսուսային որոշում կկայացվի՝ միաժամանակ ընդգծելով, որ քաղաքային խնդիրները պետք է շարունակվեն բարձրաձայնվել։
«Այս մասով ունեմ իմ կուսակցության ամբողջական սատարումը, իսկ դրա ձևաչափը կորոշվի այդ օրը»,-ասել է Դավիթ Խաժակյանը։
Հիշեցնենք, որ դեկտեմբերի 17-ին ԼՀԿ նախագահ Էդմոն Մարուքյանը հայտնել էր, որ «Լուսավոր Հայաստան» կուսակցությունը քննարկում է Երևանի ավագանիում իր միակ անդամին` Դավիթ Խաժակյանին ետ կանչելու և ավագանիում նրա գործունեության շարունակության նպատակահարմարության հարցը:
