1․ «Հրապարակ» թերթը գրում է՝ իրենց ՍԴ աղբյուրի փոխանցմամբ՝ այն օրվանից, երբ Վահե Գրիգորյանը սկսեց մասնակցել ՍԴ նիստին, ՍԴ-ում իսկապես արդեն խորը ճգնաժամ է։
Ալվինա Գյուլումյանը չի գնում աշխատանքի։ Նա գտնում է, որ իր իրավունքները պաշտպանելու ձևը գիտի. դատական ճանապարհն է, և որևէ մեկի հետ չի ցանկանում առճակատման մեջ մտնել: Ֆելիքս Թոխյանը վատառողջ է, այդ պատճառով չի գնում, Հրանտ Նազարյանը նույնպես չի գնում:
Հուլիսի 7-ին նշանակված ՍԴ նիստը կկայանա, եթե դատավորները գնան»: Ըստ աղբյուրի՝ բարդ է ասել` կգա՞ն դատավորները, թե՝ ոչ։
Ի դեպ, հուլիսի 7-ի նիստին, բացի Ռոբերտ Քոչարյանին վերաբերող հարցից, օրակարգում ներառված է ևս 6 հարց:
2․ «Հրապարակ» թերթը գրում է, որ այսօր առողջապահության նախարար Արսեն Թորոսյանը ներկայանալու է իր նախկին տեղակալ Արսեն Դավթյանի՝ կաշառք վերցնելու գործով դատական նիստին և սենսացիոն ցուցմունք է տալու։
Դա միջնորդել են ամբաստանյալի պաշտպանները, ուստի ենթադրելի է, որ նա պաշտպանական ցուցմունք է տալու։
Ըստ թերթի տեղեկությունների՝ հայտարարելու է, թե այս գործում չկա կաշառքի հանցակազմ, այլ առկա է
խարդախություն մյուս ամբաստանյալի՝ հանրապետական ծննդատան տնօրեն Ռազմիկ Աբրահամյանի կողմից, և որ իր տեղակալը չէր կարող ինքնուրույն փոխել պետպատվերի չափը։
3․ «Հրապարակ» թերթը գրում է, որ Արտաշատի բժշկական կենտրոնի երրորդ հարկից իրեն ցած նետած՝
կորոնավիրուսային հիվանդության դեմ բուժում ստացող 55-ամյա կնոջ վիճակը շարունակում է ծանր մնալ։ Նա այս պահին «Գրիգոր Լուսավորիչ» ԲԿ-ի վերակենդանացման բաժանմունքում է, գիտակցությունը տեղն է, երկկողմանի թոքաբորբ է տանում։
Հիվանդանոցից հայտնեցին նաև, որ եթե կորոնավիրուսային վիճակը թույլ տա, եկող շաբաթ կինը վնասվածքաբանական և նյարդաբանական մի քանի վիրահատության կենթարկվի։ «Երկու վիրահատություն է նախատեսվում, ընդ որում՝ մի քանի էտապով։ Այս պահին դեռ թոքաբորբն է բուժվում»,- ասաց հիվանդանոցի մամուլի պատասխանատու Ծովինար Խաչատրյանը։
Վնասված են տիկնոջ 2 ոտքը և ողնաշարը։
4․ «Ժողովուրդ» օրաթերթը գրում է, որ «Սևան ազգային պարկ» ՊՈԱԿ-ում հետաքրքիր զարգացումներ են տեղի ունենում. նախ՝ աշխատանքից ազատվել է պարկի տնօրենը՝ Վարդան Վարդանյանը: Ասել է թե՝ նախարարի պարտականությունները կատարող Վահե Ջիլավյանը չի ցանկացել շարունակել աշխատել նախկին նախարար Էրիկ Գրիգորյանի կադրերի հետ: Վարդանյանի ազատվելուց հետո սկսել են ազատման դիմումներ գրել նաեւ ՊՈԱԿ-ի մյուս աշխատողները:
«Ժողովուրդ» օրաթերթը զրուցել է արդեն գործազուրկ տնօրենի հետ և հետաքրքրվել ազատման իրական պատճառների մասին: Նախ՝ նշենք, որ սա անակնկալ է եղել Վարդանյանի համար: «Ճիշտն ասած ես հիմա վատառողջ պառկած եմ, բայց աշխատանքային պայամանագրի ժամկետն ավարտվել է, չի երկարաձգվել: Բնականաբար, այն չի երկարաձգվել գործատուի՝ նախարարության կողմից: Մինչև ծանուցում ստանալը անակնկալ էր ինձ համար:
Պարզապես ծանուցել են, որ պայմանագիրը չի երկարաձգվել: Ես ինքս կուզեի իմանալ, թե ինչ խնդիր է եղել: Առողջանալուց հետո կորոշեմ թե ինչ անել»,- տեղեկացրեց Վարդան Վարդանյանը:
Ի դեպ, նշենք, որ այժմ ՊՈԱԿ-ի տնօրենի լիազորություննները ժամանակավորապես կատարում է տեղակալը՝ Արայիկ Հունանյանը:
5․«Ժողովուրդ» օրաթերթը գրում է, որ ՀՀ քննչական կոմիտեն վկայի կարգավիճակով հարցաքնության է հրավիրել նաև Երևանի ավագանու «Բարգավաճ Հայաստան» խմբակցության անդամ Մարկոս Հարությունյանին: Ոստիկանությունում Մարկոս Հարությունյանին վախեցրել են՝ ասելով. «Եթե մեկ անգամ էլ քեզ բերման ենթարկենք, տանելու ենք Մեղրի քաղաք»:
ArmLur.am-ը Երևանի ավագանու «Բարգավաճ Հայաստան» խմբակցության անդամ Մարկոս Հարությունյանից հետաքրքրվել է՝ նախաքննական մարմնի ձեռքում կան այնպիսի ապացույցներ, մասնավորապես՝ հեռախոսային խոսակցություններ, թե ինչպես է ենթադրենք Մարկոս Հարությունյանը զանգահարում կամ այլ կապի միջոցով մարդկանց հորդորում գնալ ԱԱԾ-ի շենք և բողոքի ակցիա իրականացնել:
Ակնհայտ է մեկ բան, որ նախաքնական մարմինը դեռևս փնտրում է հունիսի 14-ին Ազգային անվտանգության ծառայության դիմաց բողոքի ակցիայի կազմակերպիչներին, սակայն հարցաքննվածները դեռևս կազմակերպչի անուն չեն տալիս: Ասել է, թե իրավապահները դեռ փնտրում են ու փնտրում:
6․ «Ժողովուրդ» օրաթերթի տեղեկություններով՝ ՀՀ քննչական կոմիտեում նույն մարմնի նախկին նախագահ և նախկին դատախազ Աղվան Հովսեփյանի մասով քրեական գործ է հարուցված եղել և քննվել, սակայն այլ ընթացք է ստացել:
«Ժողովուրդ» օրաթերթի տեղեկություններով՝ Քննչական կոմիտեի մի շարք քննիչներ ասել են, որ հենց Աղվան Հովսեփյանի՝ Քննչական կոմիտեի նախագահ լինելու տարիներին են նշանակվել, պաշտոն ստանձնել՝ հարց բարձրացնելով, որ ճիշտ չէ՝ Աղվան Հովսեփյանի մասով քրեական գործը քննվի հենց Քննչական կոմիտեում: Եվ, ահա, «Ժողովուրդ» օրաթերթի տեղեկություններով՝ ՔԿ ղեկավարությունը, հաշվի առնելով այդ հանգամանքը, որոշում է կայացրել քրեական գործն ուղարկել Հատուկ քննչական ծառայություն:
«Ժողովուրդ» օրաթերթին չհաջողվեց պարզել, թե կոնկրետ որ հոդվածով է քրեական գործ հարուցվել Աղվան Հովսեփյանի նկատմամբ, կամ ինչու է Քննչական կոմիտեի նախկին նախագահը հայտնվել իրավապահների ուշադրության կենտրոնում, սակայն ակնհայտ է, որ այդ ամենը կապ ունի հենց իր պաշտոնական գործունեության հետ, և թերևս իրավապահներին այդ մասով մանրամասներ են հայտնի դարձել:
«Ժողովուրդ» օրաթերթը մեկնաբանության համար դիմեց ՀՔԾ՝ հասկանալու համար՝ արդյոք իրենց մոտ Աղվան Հովսեփյանի մասով քրեական գործ քննվում է, թե ոչ, սակայն, ի պատասխան, ՀՔԾ-ն չմեկնաբանեց: Հույժ գաղտնի տեղեկություն է:
7․ «Ժողովուրդ» օրաթերթը տեղեկացավ, որ Երևանի ընդհանուր իրավասության դատարանի դատավոր Կարինե Պետրոսյանի կողմից վարույթ է ընդունվել Երևանի քաղաքապետարանի ենթակայության տակ գտնվող «Թափառող շների վնասազերծման» ՀՈԱԿ-ի քարտեզագրման հսկիչ Աշոտ Մելոյանի քաղաքացիական հայցը ընդդեմ Երևանի ավագանու «Լույս» խմբակցության ղեկավար Դավիթ Խաժակյանի՝ պահանջելով հերքել պատիվն ու արժանապատվությունն արատավորող տեղեկությունները և փոխհատուցում տրամադրել:
8․ «Փաստ» թերթի աղբյուրների փոխանցմամբ, ներկայումս իշխանությունների թիրախում են հայտնվել
հանրակրթական դպրոցի մի շարք տնօրեններ, որոնց անունները նախկինում այս կամ այն կերպ շաղկապված են եղել տարբեր պատմությունների հետ՝ հատկապես ընտրությունների մասով։
Տեղեկատվության համաձայն՝ հատուկ հանձնարարություն է իջեցվել՝ իրականացնել հստակ սելեկցիա և ստանալ ամբողջական պատկեր։ Թերթի աղբյուրը փոխանցել է, որ ներկա փուլում բավականին մեծ թվով ՔՊ-ականներ կամ առնվազն իրենց իշխանափոխության շահառու համարողներ տնօրենների լիցենզիայի համար քննություններ են տվել և ձեռք բերել համապատասխան փաստաթուղթը, որպեսզի առաջիկա մրցույթների ժամանակ իրենց հայտերը ներկայացնեն և ստանձնեն տնօրենի պաշտոն:
9․ «Ժողովուրդ» թերթը գրում է, որ «Մեկ Հայաստան» կուսակցության նախագահ Արթուր Ղազինյանը երեկ ստացել է նոր կորոնավիրուսի համաճարակի դեմ պայքարը տապալելու փաստի առթիվ քրեական գործ հարուցելու իր կողմից ներկայացված հաղորդման Հատուկ քննչական ծառայության պաշտոնական պատասխանը։ «Ժողովուրդ» օրաթերթը տեղեկացավ, որ Հատուկ քննչական ծառայությունը մերժել է Արթուր Ղազինյանի հաղորդման հիման վրա քրեական
գործ հարուցել:
10․ «Ժողովուրդ» թերթը գրում է, որ Ազգային ժողովի պետաիրավական հանձնաժողովի նախագահ Վլադիմիր Վարդանյանը «ընդհատակ է անցել»: Բանն այն է, որ վերջին օրերին խորհրդարանում քննարկված նախագծերի, դրանց շուրջ քննադատությունների համար, բացի արդարադատության նախարար Ռուստամ Բադասյանից, մեղադրում են նաև Վլադիմիր Վարդանյանին:
Խոսքն առաջին հերթին վերաբերում է Սահմանադրական դատարանի հարցի լուծմանը, որին իշխանությունները ներգրավվել են խորհրդարանի ձևավորումից ի վեր և, այսպես ասած, հինգ փուլ անցել, տարբեր նախագծեր ներկայացրել, սակայն լուծման այդպես էլ չեն հասել:
Այդ ամենի հետ մեկտեղ առկա են քննադատություններ նաև եվրոպական կառույցների, արտախորհրդարանական, խորհրդարանական ուժերի կողմից, և թիրախում երկու անձ է՝ Ռուստամ Բադասյանն ու Վլադիմիր Վարդանյանը:
Դրան զուգահեռ վերջինիս համարում են նաև Սահմանադրական դատարանի դատավորի թեկնածու, սակայն միևնույն ժամանակ մտածում են, թե այդ դեպքում ԱԺ պետաիրավական հանձնաժողովն ավելի կթուլանա, առանց այն էլ մշտապես քննադատությունների թիրախում է:
Սակայն, ամեն դեպքում, մի քանի օր է՝ Վլադիմիր Վարդանյանը «անհետացել է»՝ չցանկանալով հանդես գալ պարզաբանումներով: Նկատենք, որ նա պասիվ էր նաև հունիսի 30-ին տեղի ունեցած Ազգային Ժողովի արտահերթ նիստի ժամանակ: Թերևս պատճառը հենց քննադատություններն են նրա հանդեպ:
11․ «Իրավունք» թերթը գրում է, որ խորհրդարանական «Բարգավաճ Հայաստան» և «Լուսավոր Հայաստան» խմբակցությունները նախաձեռնել են քննիչ հանձնաժողովի ստեղծում` համավարակի դեմ պայքարի միջոցառումների արդյունավետությունը պարզելու նպատակով, և դիմել ԱԺ նախագահ Արարատ Միրզոյանին: «Իրավունքի» ունեցած տեղեկությունների համաձայն` իշխող խմբակցության ակտիվը «նստել է» ԱԺ նախագահի ականջին, թե պետք է թույլ չտալ, որ նման հանձնաժողով ստեղծվի հիմա, որի իրավական արդարացումն են փնտրում:
Երկար քննարկումներից հետո` միակ, այսպես ասած, հիմնավորումը գտել են արդեն հայտնի դարձած լոզունգը, թե համավարակն էլ պատերազմ է, և սխալ է այս ընթացքում նման նախաձեռնությամբ հանդես գալ:
Ինչո՞ւ ոչ հիմա և ի՞նչ կտա տևական ժամանակ հետո` ստեղծել վերոնշյալ հանձնաժողովը, իշխանական շրջանակներն ունեն իրենց բացատրությունը: Ըստ նրանց, երբ բավական ժամանակ անցնի, մի շարք աղմկոտ խնդիրներ ու բացթողումներ էլ կմոռացվեն, ուստի` շատ ավելի հեշտ կլինի դրա տակից դուրս գալը:
