«Ուժեղ Հայաստան» և «Հայաստան» դաշինքները, ինչպես նաև «Բարգավաճ Հայաստան», «Հայ ազգային կոնգրես» և «Ազգային-ժողովրդավարական բևեռ» կուսակցությունները Սահմանադրական դատարանի՝ ԱԺ ընտրությունների արդյունքները վիճարկող հայցերի վերաբերյալ որոշումից հետո համատեղ հայտարարություն են տարածել՝ հայտնելով համատեղ գործողությունների և միասնական քաղաքական օրակարգ ձևավորելու մասին։
Քաղաքական ուժերը նշել են, որ Սահմանադրական դատարանի որոշումը, իրենց գնահատմամբ, չի լուծում ձևավորվող իշխանության լեգիտիմության հարցը, չի վերացնում ընտրական կեղծիքներն ու զանգվածային ընտրախախտումները և խորացնում է երկրում առկա քաղաքական ու իրավական ճգնաժամը։
Հայտարարության հեղինակները նշել են, որ Սահմանադրական դատարանի որոշումը «ոչ թե պայքարի ավարտն է, այլ նոր՝ ավելի համակարգված, ինստիտուցիոնալ և լայնածավալ քաղաքական դիմադրության փուլի սկիզբը»։
Նրանք նաև հայտնել են, որ վերոնշյալ հարցերի շուրջ ընդդիմադիր ուժերի քննարկումները շարունակվում են, իսկ հետագա քայլերի և հնարավոր համատեղ ծրագրերի մասին կհայտնեն առաջիկայում։
Այսօր ավելի վաղ ՍԴ-ն մերժել էր ընտրությունների արդյունքներն անվավեր ճանաչելու մասին դիմումները։
Ընտրությունների արդյունքները չեղարկելու կամ քվեարկության երկրորդ փուլ նշանակելու պահանջով Սահմանադրական դատարան էին դիմել «Ուժեղ Հայաստան», «Հայաստան», «Հանուն Հանրապետության ժողովրդավարության պաշտպաններ» դաշինքները, ինչպես նաև «Նոր ուժ», «Բարգավաճ Հայաստան», «Միասնության թևեր» և «Դեմոկրատիա, օրենք, կարգապահություն» կուսակցությունները։ Գործի քննությունը տևել է 6 օր, իսկ դատական նիստերի ընդհանուր տևողությունը կազմել է շուրջ 50 ժամ։ Հուլիսի 1-ին Սահմանադրական դատարանը լսել էր դատավարության մասնակիցների ամփոփիչ ելույթները և հեռացել խորհրդակցական սենյակ՝ որոշում կայացնելու։
