«Ուժեղ Հայաստան» կուսակցության քաղխորհրդի անդամ Նարեկ Կարապետյանը մեկնաբանել է ԱՄՆ կոնգրեսում Ադրբեջանցիների՝ իբրև թե Հայաստանից արտաքսման մասին պլանավորված քննարկման մասին լուրը:
Նա նշել է, որ քանի դեռ Հայաստանի կառավարությունը հրաժարվում է անցյալից՝ հայ ժողովրդին համոզելով, որ ինքն է խնդիրը, որ իր վրա հարձակվել են, Ադրբեջանի կառավարությունը հնարում է նոր անցյալ ու ամբողջ աշխարհին նախապատրաստում իր հետագա պահանջներին:
Ադրբեջանական ԶԼՄ-ները գրել են, որ վաղը՝ հունիսի 24-ին, Վաշինգտոնում տեղի կունենա միջազգային համաժողով՝ նվիրված «Հայաստանի կողմից իրականացված ադրբեջանցիների էթնիկ զտմանը»։
Լրատվամիջոցների փոխանցմամբ՝ Կապիտոլիումում ծրագրված հավաքի կազմակերպիչը 2023-ին Ադրբեջանի կողմից ստեղծված Բաքվի նախաձեռնող խումբն է, որն իրենց երկրից է ֆինանսավորվում։
Կառույցն իր գործունեության սկզբնական շրջանում հանդես էր գալիս «ֆրանսիական գաղութատիրության դեմ» պայքարի դիրքերից, հետագայում խմբի գործունեության թիրախում էին հայտնվել նաև Հնդկաստանի իշխանությունները։
