ՀՀ ԱԳ նախարար Արարատ Միրզոյանն Armenia Today-ին չի մեկնաբանել ԵՄ դիտորդներին «մի կրակոցով հեռացնելու» Ադրբեջանի նախագահ Իլհամ Ալիևի խոսքերը՝ նշելով, որ Հայաստանի ու Ադրբեջանի միջև խաղաղություն է հաստատվել։
Ալիևն ավելի վաղ հայտարարել էր, որ եթե մի կրակոց արձակեին, դիտորդներն անմիջապես կփախչեին, և այնտեղ անգամ նրանց հետքը չէր մնա։
«Հայաստանի և Ադրբեջանի միջև այլևս խաղաղություն է հաստատված․ կրակոցներ չեն հնչում, ըստ այդմ՝ վիրավորներ և զոհեր էլ չկան»,- նշել է Միրզոյանը։
Նախարարի խոսքով՝ դիտորդները ժամանակիին նշանակալի դեր են ունեցել նաև մթնոլորտի ձևավորման հարցում։
«Նորմալ համագործակցում ենք ԵՄ դիտորդական առաքելության հետ, իրենք իրենց մանդատի ժամկետի մեջ են և իրենց գործունեությունն իրականացնում են։ Նրանք նշանակալից դեր են խաղացել ժամանակին, նաև՝ մթնոլորտի ձևավորման համար»,- ընդգծել է Միրզոյանը։
2023 թվականի փետրվարի 20-ին մեկնարկել էր ԵՄ-ի քաղաքացիական առաքելությունը Հայաստանում, 2023 թվականի դեկտեմբերին ԵՄ-ն որոշել էր Հայաստանում դիտորդների թիվը 138-ից հասցնել 209-ի:
2024 թվականի նոյեմբերի 23-ին ՀՀ վարչապետ Նիկոլ Փաշինյանը հայտարարել էր, որ Ադրբեջանին առաջարկել էր ԵՄ դիտորդներին հանել սահմանազատված հատվածներից։ Սեպտեմբերի 1-ին Ադրբեջանի նախագահի օգնական Հիքմեթ Հաջիևը հայտարարել էր, որ Երևանի և Բաքվի միջև սահմանազատման հանձնաժողովի վերաբերյալ պայմանավորվածությունը «բավարար է» ԵՄ դիտորդական առաքելությունը Հայաստանից դուրս բերելու համար։
Հունվարի 29-ին ԵՄ երկրների դեսպանները հավանություն էին տվել Հայաստանում դիտորդական առաքելության երկարաձգմանը։ Ալիևը հունվարին քննադատել էր հայկական «Խաղաղության խաչմերուկ» նախագիծը՝ այն անվանելով «ուղղակի թղթի կտոր»։
Փետրվարի 25-ին Հայաստան-Եվրամիություն խորհրդարանական գործընկերության հանձնաժողովի համանախագահ Նիլս Ուսակովսը հայտարարել էր, որ Բաքուն և Մոսկվան քննադատում են ԵՄ դիտորդական առաքելությունը՝ դիտելով այն որպես սպառնալիք խաղաղության պայմանագրի համար։
