Ֆրանսիայի հայկական կազմակերպությունների համակարգող խորհրդի (CCAF) ազգային գրասենյակը դժգոհություն է հայտնել Ֆրանսիայի հայկական համայնքի մի շարք ներկայացուցչական անձանց Փարիզում ՀՀ դեսպանության նոր շենքի բացման արարողությանը չհրավիրելու Հայաստանի կառավարության որոշման վերաբերյալ:
Խորհուրդը նման որոշումը որակել է որպես ցավալի սխալ։ Նշվում է, որ դեսպանատան բացմանը հնարավորություն չունեին մասնակցելու խորհրդի համանախագահներ Արա Թորանյանը և Մուրադ Փափազյանը, Ֆրանսիայի հայոց թեմի առաջնորդ Տ․ Գրիգոր եպիսկոպոս Խաչատրյանը և Ֆրանսիայում Արցախի ներկայացուցիչ Հովհաննես Գևորգյանը։
CCAF-ից շեշտել են, որ դեսպանությունն ամբողջ ազգի ընդհանուր տունն է, այն վայրը, որտեղ Հայաստանը ներկայանում է իր ամբողջականությամբ, բազմազանությամբ և արժանապատվությամբ՝ վեր կանգնելով պահի տարակարծություններից և կուսակցական հաշվարկներից։
«Սահմանափակելով Ֆրանսիայի հայկական համայնքի ճանաչված ներկայացուցիչների մուտքը՝ ՀՀ կառավարությունը հեռանում է ազգի համախմբման իր կոչումից»,- ասվում է հայտարարության մեջ։
Խորհուրդը շեշտել է, որ Թորանյանի և Փափազյանի անուններն անքակտելիորեն կապված են Ցեղասպանության հիշողության, ճանաչման և հայ ժողովրդի արժանապատվության պաշտպանությանն ուղղված տասնամյակների պայքարի հետ։
«Ժողովրդավարորեն ընտրված ղեկավարներին զրկելը նշանակում է զրկել սփյուռքի կազմակերպված հատվածի զգալի մի մասի»,- նշել են գրասենյակից։
Կազմակերպությունից հիշեցրել են, որ 1995 թվականից ի վեր՝ Հայ Առաքելական եկեղեցին ներկայիս շենքն անվճար տրամադրում է ՀՀ դեսպանությանը։ Իսկ Ֆրանսիայում Արցախի ներկայացուցիչ Գևորգյանի չմասնակցելը միջոցառմանը, ասվում է հայտարարության մեջ, նշանակում է բացասական ուղերձ Ֆրանսիայի քաղաքական շրջանակներում հայրենի հողից վտարված, գաղթի հարկադրված և ամեն ինչից զրկված 120 000 արցախահայերի իրավունքների պաշտպանությանն ուղղված գործին։
Այսօր ավելի վաղ ՀՀ ԱԳ նախարար Արարատ Միրզոյանը հայտնել էր Փարիզում ՀՀ դեսպանության նոր շենքի բացման մասին։
