Հայաստանի տարածքով անցնող տրանսպորտային միջանցքների նախագծերին Ռուսաստանի մասնակցությունը կարող է հանգեցնել տարածաշրջանում Մոսկվայի ազդեցության կորստին, հայտնել է Պետդումայի ԱՊՀ գործերով կոմիտեի նախագահի առաջին տեղակալ Կոնստանտին Զատուլինը Свободная пресса-ին։
Մեկնաբանելով Թուրքիային և Ադրբեջանին հարող երկաթուղային հատվածների վերանորոգմանը Ռուսաստանի ներգրավման վերաբերյալ ՀՀ վարչապետ Նիկոլ Փաշինյանի առաջարկները՝ պատգամավորը նշել է, որ այդտեղ կա թաքնված ճնշում։ Ըստ նրա՝ Երևանից հնչում են ազդանշաններ «Հարավկովկասյան երկաթուղու» պայմանագրի վերանայման հնարավորության մասին, եթե Մոսկվան հրաժարվի մասնակցել այդ աշխատանքներին։
Զատուլինի կարծիքով՝ նման նախաձեռնությունները նպատակ ունեն հետագայում Ռուսաստանի վրա դնել տրանսպորտային նոր միջանցքի ստեղծման պատասխանատվություն՝ առանց նրան ձայնի իրավունքի կամ շահույթի մասնաբաժին տրամադրելու։ Այս համատեսքտում պատգամավորը վկայակոչել է Լեռնային Ղարաբաղում ռուսական խաղաղապահ առաքելության ընթացքում ստեղծված իրավիճակը, երբ նրանք Լաչինի միջանցքի շրջափակման ժամանակ հայտնվել էին «դիտորդի» դերում։
Խոսելով Հայաստանում TRIPP (The Transregional Railways and Infrastructure Peace and Prosperity) նախագծի մասին՝ Զատուլինն ընդգծել է, որ խոսքն աշխարհաքաղաքական ծրագրի մասին է, որն ուղղված է Թուրքիայի և Ադրբեջանի միջև ուղիղ կապի հաստատմանը։ Նրա գնահատմամբ՝ դա բխում է ԱՄՆ շահերից, որը ձգտում է ուժեղացնել ներկայությունը տարածաշրջանում և դուրս մղել ռուսական ազդեցությունը։ Զատուլինը շեշտել է, որ նման պայմաններում Ռուսաստանը պետք է առնվազն ձեռնպահ մնա այդ նախագծերին «սպասարկողի» կարգավիճակով մասնակցելուց։
Անդրադառնալով երկկողմ հարաբերություններին՝ ռուս պատգամավորը նշել է, որ Մոսկվա կատարած այցի ժամանակ ԱԺ նախագահ Ալեն Սիմոնյանին ներկայացվել են դժգոհություններ նրա հակառուսական հայտարարությունների կապակցությամբ։ Զատուլինի խոսքով՝ այցն այնքան էլ հարթ չի անցել, որքան ներկայացվել է հայ հանրությանը։
