Ամերիկյան հայտնի փաստաբան, ԱՄՆ Հանրապետական կուսակցության ղեկավար շրջանակի նշանավոր ներկայացուցիչ Ռոբերտ Ամստերդամը ժամանել է Հայաստան ու լրագրողներին պատմել իր այցի նպատակների մասին, որոնց թվում նաև «Տաշիր» ընկերությունների խմբի կալանավորված նախագահ Սամվել Կարապետյանին պաշտպանելն է։
«Հայաստան այցի իմ հիմնական նպատակը պաշտպանելն է եկեղեցուն, նրա զավակներին, որոնք ապօրինաբար զրկվել են ազատությունից։ Երբ մարդիկ հավատացյալ են, սիրում են իրենց եկեղեցիները, ինչպես պարոն Կարապետյանը, բայց իրենց բիզնեսն ապօրինաբար ռեյդի է ենթարկվում, ուրեմն ինչ-որ բան այնպես չէ։ Այս դեպքում կառավարության և եկեղեցու միջև երկխոսության անհրաժեշտություն կա»,- ասել է փաստաբանը։
Նա հույս է հայտնել, որ այդ երկխոսությունը կսկսվի, հարուցված գործերը կկարճվեն, և եկեղեցին պաշտպանված կլինի։ Ամստերդամը շեշտել է, որ Հայ Առաքելական եկեղեցին առանցքային նշանակություն ունի աշխարհի բոլոր քրիստոնյա ազգերի համար։
«Բոլոր հավատացյալները պարտավոր են պաշտպանել եկեղեցին»,- ընդգծել է փաստաբանը։
Ամստերդամը հավելել է, որ իր աշխատանքային գործունեության ընթացքում բազմաթիվ եկեղեցիներ է պաշտպանել, ինչի համար թեև ճնշումների է ենթարկվել, բայց շարունակել է աշխատել։
«Պարզ է, որ կարող է լինել ճնշում, բայց որպեսզի այդ ճնշումը հասնի իր նպատակին, պետք է լինի մեկը, որը կենթարկվի այդ ճնշմանը։ Պաշտպանելով կրոնը, իրավունքի գերիշխանությունը՝ մենք չենք ճկվում։ Ես սովոր եմ ճնշումների»,- նշել է նա։
Ամստերդամը հավելել է, որ պատրաստ է քննարկումներ սկսել Հայաստանի կառավարության ներկայացուցիչների հետ՝ ընդգծելով, որ ԱՄՆ-ում հանդիպումներ է ունեցել հայկական շրջանակների հետ։
Օգոստոսի 8-ին News.am-ը գրել էր, որ Ամստերդամը, որը հայտնի է նաև որպես քաղաքական հարցերով առաջին կարգի միջազգային իրավաբան, ժամանելու է Հայաստան Հայ Առաքելական եկեղեցու և Կարապետյանի գործերի համար։
ՀՀ ներքին գործերի նախարարության հատուկ նշանակության ստորաբաժանումները հունիսի 17-ին խուզարկություններ էին սկսել Կարապետյանի տանը՝ Հայ Առաքելական եկեղեցու և հոգևորականների նկատմամբ իշխանությունների գործողությունները քննադատելուց հետո։ Հունիսի 18-ից Կարապետյանը երկու ամսով կալանավորվել էր, նրան մեղադրում են իշխանությունը զավթելու կոչեր անելու համար: Կարապետյանը մեղադրանքը չի ընդունում։
Իրավապահ մարմինները հունիսի 25-ի խուզարկություններից հետո երկու ամսով կալանավորել էին Բագրատ արքեպիսկոպոս Գալստանյանին, ինչպես նաև նրա առաջնորդած ընդդիմադիր «Սրբազան պայքար» շարժման 14 աջակցի՝ ահաբեկչության և պետական հեղաշրջման փորձ կազմակերպելու մեղադրանքով։ Հունիսի 27-ի խուզարկություններից հետո երկու ամսով կալանավորել էին Շիրակի թեմի առաջնորդ Միքայել արքեպիսկոպոս Աջապահյանին՝ իշխանությունը զավթելուն ուղղված հրապարակային կոչեր հնչեցնելու մեղադրանքով: Կալանավորվածները չեն ընդունում մեղադրանքը:
Կարդացեք նաև՝
«Պայքար՝ մեր ձևով». Երևանում հավաք ու երթ է անցկացվել՝ ի աջակցություն Սամվել Կարապետյանի
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
