Քննչական կոմիտեից 590 000 դոլարի հափշտակությունը մանրակրկիտ պլանավորված էր․ գումարի մեծ մասը հայտնաբերվել է ՀՀ ՆԳՆ ոստիկանության, ՀՀ ազգային անվտանգության ծառայության և ՀՀ հակակոռուպցիոն կոմիտեի համատեղ ձեռնարկած միջոցառումների արդյունքում։
«Բացահայտվել են տևական ժամանակ նախապատրաստված և մանրակրկիտ պլանավորված հափշտակության դեպքը, խմբի անդամների ինքնությունները, նրանց դերաբաշխումները, ինչպես նաև հափշտակության մեխանիզմն ու գումարի պահման վայրերը»,- ասվում է հաղորդագրությունում:
Նշվում է, որ հանցանք կատարած անձինք ձերբակալվել են, իսկ կատարված խուզարկությունների և վարութային այլ գործողությունների արդյունքում հայտնաբերվել և վերցվել է հափշտակված 590 000 դոլար գումարի մեծ մասը՝ 578 800 դոլարը։ Ձերբակալված անձինք անհերքելի փաստերի ճնշման ներքո տվել են խոստովանական ցուցմունքներ:
Նախաքննությունը շարունակվում է, ձեռնարկվում են միջոցառումներ մնացած՝ 11 200 դոլար գումարը հայտնաբերելու ուղղությամբ:
Մայիսի 21-ին ՔԿ տնտեսական հանցագործությունների և մաքսանենգությունների քննության գլխավոր վարչության շենքից հափշտակվել էր որպես իրեղեն ապացույց պահվող 590 000 դոլար։ Ըստ «Փաստինֆո»-ի՝ գործով ձերբակալվել էր գլխավոր վարչության 5-րդ վարչության պետը։
Մայիսի 22-ին ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության վարչական շենքից առանձնապես խոշոր չափերով գումար հափշտակելու դեպքի առթիվ քրեական վարույթ էր նախաձեռնվել։
