Քննչական կոմիտեն քրեական գործ է հարուցել Հրազդան քաղաքում արցախցի տեղահանված Ներսես Աբգարյանի սպանության դեպքի առթիվ, Armenia Today-ին հայտնեց գործակալության մամուլի քարտուղար Կիմա Ավդալյանը։
Նրա խոսքով՝ գործը հարուցվել է 155 հոդվածի 1-ին մասով (սպանություն, առավելագույն պատիժը՝ մինչև 15 տարի ազատազրկում)։
Ավելի վաղ «Նորություններ Արցախից» ֆեյսբուքյան էջը հայտնել էր, որ Աբգարյանը դաժանաբար սպանվել է փետրվարի 8-ի առավոտյան։ Հաղորդագրության մեջ նշվում էր, որ սպանությունից հետո նրան տեղափոխել են «Հրազդան» բժշկական կենտրոնի բակ։
Աբգարյանը մասնակցել է Արցախյան պատերազմներին։ 2023 թվականի սեպտեմբերի վերջին Արցախից բռնի տեղահանվելուց հետո ընտանիքով հաստատվել էր Հայաստանում։
