ՀՀ ԱԱԾ քննչական դեպարտամենտը մերժել է Աշոտ Մինասյան ԵՐԿԱԹ-ի գործով վերջինիս նկատմամբ իրականացվող քրեական հետապնդումը դադարեցնելու մասին միջնորդությունը, իսկ քրեական գործը մեղադրական եզրակացությամբ երեկ ուղարկվել է ՀՀ գլխավոր դատախազություն։ Այս մասին հայտնել է «Սիսական» ջոկատի հրամանատար Աշոտ Մինասյանի Պաշտպանության Խորհրդի անդամ, Աշոտ Մինասյանի պաշտպան Միհրան Պողոսյանը։
«Երեկ՝ 29.12.2021-ին, բողոք եմ ներկայացրել ՀՀ գլխավոր դատախազին՝ մանրամասն ներկայացնելով, թե ինչո՞ւ պետք է Ա. Մինասյանի նկատմամբ քրեական հետապնդումը դադարեցվի։ Ի լրումն սույն բողոքի և հաշվի առնելով այն հանգամանքը, որ ՀՀ քրեական դատավարության օրենսգրքի 275-րդ հոդվածի համաձայն՝ մեղադրական եզրակացությամբ ստացված գործով դատախազն իրավունք ունի վերացնել կամ փոխել խափանման միջոցը, ՀՀ գլխավոր դատախազին ներկայացրել եմ նաև Աշոտ Մինասյանի նկատմամբ ընտրված խափանման միջոցը վերացնելու կամ փոփոխելու միջնորդություն։
Միջնորդությամբ հանգամանալից ներկայացվել են Աշոտ Մինասյանի անձը բնութագրող, անձնական, առողջական տվյալները, վերջինիս նկատմամբ կիրառված խափանման միջոցի ենթադրյալ հիմքերի վերանալու մասին տվյալները և խնդրել եմ քրեական գործի ցանկացած հեռանկարի պայմաններում /գործն ըստ էության դատարան ուղարկելու կամ լրացուցիչ քննության վերադարձնելու կամ քրեական հետապնդումը դադարեցնելու/ վերացնել և փոփոխել առաջին անգամ և միմիայն մեկ միջին ծանրության ենթադրյալ հանցանքի մեջ մեղադրվող 62 ամյա անձի նկատմամբ կիրառված ամենախիստ խափանման միջոցը՝ կալանավորումը, ընդ որում՝ ընդգծելով, որ Աշոտ Մինասյանի նկատմամբ խափանման միջոցը չվերացնելու դեպքում կարող է կիրառվել ազատության սահմանափակման հետ չկապված ցանկացած խափանման միջոց, այդ թվում դեռևս 13.12.2021-ին ՀՀ գլխավոր դատախազին դիմած պատվարժան անձանց՝ Բագրատ Եպիսկոպոս Գալստանյանի, Գրիգորի Խաչատուրովի և Հրանտ Թոխատյանի անձնական երաշխավորությունները։
Համոզված եմ, որ ՀՀ գլխավոր դատախազությունում մի պահ կկտրվեն ամանորյա ենթադրյալ եռուզեռից և հենց այսօր կամ վաղը՝ մինչև Աշոտ Մինասյանի ծննդյան օրը, առնվազն խափանման միջոցի վերաբերյալ կկայացնեն օբյեկտիվ որոշում»,- նշել է պաշտպանը։
Հիշեցնենք, որ «Սիսական» ջոկատի հրամանատար Աշոտ Մինասյանը դեկտեմբերի 1-ին կալանավորվել է: Հիշեցնենք նաև, որ 2020 թվականի նոյեմբերի 15-ին ԱԱԾ աշխատակիցները բերման էին ենթարկել Աշոտ Մինասյանին՝ ՀՀ վարչապետի սպանությունը կազմակերպելու և իշխանությունը յուրացնելու փորձի կասկածանքով։ Նրան մեղադրանք է առաջադրվել ՀՀ ՔՕ 35-300-րդ հոդվածի 1-ին մասի (իշխանության յուրացման և 35-305-րդ հոդվածի՝ պետական, քաղաքական կամ հասարակական գործչի գործունեությունը դադարեցնելու նպատակով սպանության նախապատրաստման) և 235-րդ հոդվածի (ապօրինի զենք զինամթերք պահելու) կասկածանքով։ Օրերս հայտնի դարձավ, որ Աշոտ Մինասյանը վերոնշյալ քրգործի մի շարք դրվագներով արդարացվածի կարգավիճակ ունի։
