Քննչական կոմիտեն հայտնել է ՀՅԴ Հայաստանի գերագույն մարմնի ներկայացուցիչ, «Հայաստան» դաշինքի պատգամավորի թեկնածու Իշխան Սաղաթելյանին առնչվող երկու քրեական վարույթ նախաձեռնելու մասին, որոնք միացվել և քննվում են մեկ գործով։
Ըստ ՔԿ-ի՝ Հարկադիր կատարումն ապահովող ծառայությունից ստացված հաղորդման համաձայն՝ Հակակոռուպցիոն դատարանը հունվարի 5-ին արգելել էր Սաղաթելյանին և նրա կնոջը՝ Լ.Խ.-ին, որևէ գործողություն կատարել իրենց պատկանող գույքի տնօրինման հետ։ ՔԿ-ն նաև հայտնել է, որ դատարանի որոշել էր 258 մլն 146 հզր 843 ՀՀ դրամի արգելանք դնել նրանց գույքի վրա։
ՔԿ-ի տվյալներով՝ Սաղաթելյանը սկզբում հրաժարվել է ներկայացնել գույքի, եկամուտների և գույքային իրավունքների մասին հայտարարագիրը, իսկ ավելի ուշ ներկայացրած հայտարարագրում նշել է պարտադիր առգրավման ենթակա գույք, որի վրա հետագայում արգելանք է դրվել։
Միացված վարույթները Քրեական օրենսգրքի 509-րդ հոդվածի 1-ին մասի 2-րդ կետի (արգելանքի տակ գտնվող գույքի նկատմամբ ապօրինի արարքը, առավելագույն պատիժն ազատազրկում՝ 3 տարով) և 510-րդ հոդվածի 1-ին մասի (պարտապանի կողմից սեփականության իրավունքով իրեն պատկանող գույքի և գույքային իրավունքների կազմի, քանակի և գտնվելու վայրի մասին հայտարարագիր ներկայացնելուց խուսափելը, առավելագույն պատիժը՝ կարճաժամկետ ազատազրկում՝ 2 ամսով) հատկանիշներով են։
ՔԿ-ից նաև նշել են, որ հունիսի 23-ին Սաղաթելյանի բնակության վայրում և նրա կնոջը պատկանող երկու ավտոմեքենայում կատարված խուզարկությունների ընթացքում հայտնաբերվել են արտարժույթով դրամական միջոցներ և ոսկյա զարդեր։
Հունիսի 23-ին Սաղաթելայնի փաստաբան Սերգեյ Հարությունյանը և ՔԿ-ն Armenia Today-ին հայտնել էին Սաղաթելյանի բնակարանի խուզարկությունների մասին։ Փաստաբանը քննչական գործողությունները քաղաքական էր անվանել՝ կապելով այն Սաղաթելյանի գորունեության հետ։
Կենտրոնական ընտրական հանձնաժողովի վերջնական արդյունքներով՝ «Հայաստան» կուսակցությունների դաշինքը խորհրդարան անցնող երրորդ ուժն է՝ ստացել է 12 մանդատ, «Քաղաքացիական պայմանագիրն» ստացել է 64 մանդատ, «Ուժեղ Հայաստան» կուսակցությունների դաշինքը՝ 29 մանդատ։ Սաղաթելյանը դաշինքի ցուցակի 2-րդ համարն է։
