ՀՀ վարչական դատարանը մերժել է «Բարգավաճ Հայաստան» կուսակցության հայցերն ընդդեմ Կենտրոնական ընտրական հանձնաժողովի թիվ 254 և թիվ 255-Ա որոշումների, որոնցով անվավեր էին ճանաչվել երկու ընտրատեղամասերի քվեարկության արդյունքները։ Այս մասին Armenia Today-ը տեղեկացել է պաշտպանական կողմից։
Դատարանը նաև ընդգծել է ընտրատեղամասերում վերաքվեարկության անհրաժեշտությունը։
Նիստի ուղիղ հեռարձակումը հասանելի է Armenia Today-ի յութուբյան ալիքով։
Գործի նյութերի համաձայն՝ ձայների վերահաշվարկից հետո «Բարգավաճ Հայաստանն» ստացել էր բավարար թվով ձայներ խորհրդարան անցնելու անհրաժեշտ 4 %-ի շեմը հաղթահարելու համար։ Սակայն երկու տեղամասերի քվեարկության արդյունքներն անվավեր ճանաչելուց հետո կուսակցության վերջնական արդյունքը անհրաժեշտ շեմից ցածր մակարդակում է։ «Այս տեղամասերում քվեարկության արդյունքներն անվավեր ճանաչելու հետևանքով ԲՀԿ-ն չի կարողանա հաղթահարել խորհրդարան անցնելու ընտրական շեմը»,- նշված է հայցադիմումում։
Փաստաբան Արամ Օրբելյանը հայտարարել է, որ ԿԸՀ որոշումը լուրջ հարցեր է առաջացնում իրավական հիմնավորվածության տեսանկյունից։ Նրա խոսքով՝ ընտրատեղամասերում արձանագրված խախտումները պետք է քննվեն օրենքով սահմանված կարգով և լիազոր մարմնի կողմից։
Երրորդ կողմ հանդիսացող «Ուժեղ Հայաստանի» ներկայացուցիչ, փաստաբան Արամ Վարդևանյանը, նշել է, որ ԿԸՀ որոշումները կայացվել են ուղղակի նորմատիվ կարգավորումների բացակայության պայմաններում։
«Սա մեկնաբանություն է, այսինքն ուղիղ կարգավորում ընտրական օրենսգրքով առկա չէ, և Կենտրոնական ընտրական հանձնաժողովը որոշել է իրացնել մեկնաբանությունը»,- հայտարարել է նա։
Վարդևանյանն ընդգծել է նաև, որ ԲՀԿ ներկայացուցիչները չեն ծանուցվել ԿԸՀ նիստի մասին և չեն մասնակցել դրա աշխատանքներին։ Նա հավելել է, որ այս հանգամանքը կասկածի տակ է դնում պաշտպանության իրավունքի և ընթացակարգային երաշխիքների պահպանումը։
Հայաստանում խորհրդարանական ընտրություններն անցկացվել էին հունիսի 7-ին։ ԿԸՀ նախնական տվյալներով՝ «Քաղաքացիական պայմանագիր» կուսակցությունն ստացել է ձայների 49,82%-ը, «Ուժեղ Հայաստան» դաշինքը՝ 23,28%-ը, «Հայաստան» դաշինքը՝ 9,93%-ը, իսկ «Բարգավաճ Հայաստան» կուսակցությունը՝ 3,996%-ը։
ԿԸՀ-ն անվավեր էր ճանաչել քվեարկության արդյունքները երեք ընտրատեղամասերում՝ Սյունիքի մարզի Ագարակ գյուղում և Երևանի Նուբարաշեն վարչական շրջանում՝ հղում անելով այնպիսի խախտումների, որոնք կարող էին ազդել ընտրությունների վերջնական արդյունքի վրա։ Դրանից հետո «Ուժեղ Հայաստան» դաշինքը դիմել էր ԿԸՀ՝ ընտրությունների արդյունքները չճանաչելու և երկու ընտատեղամասերում վերաքվեարկության պահանջով։
Ընդդիմադիր ուժերը հայտարարել են զանգվածային խախտումների մասին և պահանջել ձայների վերահաշվարկ։ Համապատասխան պահանջներով հանդես են եկել «Ուժեղ Հայաստան» և «Հայաստան» դաշինքները, ինչպես նաև «Բարգավաճ Հայաստան» կուսակցությունը։ Խախտումների մասին հայտարարել են նաև այլ քաղաքական ուժեր։
Թե քանի քաղաքական ուժ՝ երեք, թե չորս, կանցնի նորընտիր խորհրդարան, պարզ կդառնա ԿԸՀ-ի կողմից վերջնական արդյունքների հրապարակումից հետո։ «Բարգավաճ Հայաստանի» մուտքը խորհրդարան «Քաղաքացիական պայմանագիր» կուսակցությանը կզրկի սահմանադրական մեծամասնությունից։
