Արցախի նախկին պետնախարար Արտակ Բեգլարյանը և Արցախի մարդու իրավունքների պաշտպան Գեղամ Ստեփանյանն ԱՄՆ փոխնախագահ Ջեյ Դի Վենսի՝ Հայաստան այցի կապակցությամբ նրան նամակ են ուղղել՝ ուշադրություն հրավիրելով անհայտ կորածների ճակատագրի և Բաքվում պահվող հայերի ազատ արձակման վրա։
Նամակի հեղինակները նշում են, որ խաղաղության գործընթացի, այդ թվում՝ ԱՄՆ նախագահ Դոնալդ Թրամփի կողմից առաջ մղվող «Թրամփի ուղի հանուն միջազգային խաղաղության և բարգավաճման» (TRIPP) ծրագրի հաջողությունը, կախված է հումանիտար հիմնարար խնդիրների լուծումից։
Ըստ նրանց՝ անհայտ կորածների հարցում Ադրբեջանի կողմից շարունակվող ոչ համագործակցային վարքագիծը ոչ միայն մարդասիրական խնդիր է, այլև տարածաշրջանային լարվածության կարևոր աղբյուր։
Ստեփանյանն ու Բեգլարյանը շեշտել են, որ կայուն խաղաղություն չի կարող կառուցվել «անհետ ճակատագրերի» հիմքի վրա՝ ընդգծելով անհետ կորածների հարազատների՝ ճշմարտությունն իմանալու հիմնարար իրավունքը։ Նրանք ԱՄՆ վարչակազմին կոչ են արել աջակցել չեզոք և տվյալահեն միջազգային մեխանիզմի ստեղծմանը՝ մարտական գործողությունների ընթացքում, ինչպես նաև Արցախում վառելիքի պահեստի պայթյունի ժամանակ անհայտ կորածների գտնվելու վայրերը պարզելու և նրանց նույնականացնելու համար։
Նամակում առանձին անդրադարձ է կատարվել նաև Բաքվում պահվող 19 հայ գերիների խնդրին։ Հեղինակների խոսքով՝ նրանց շարունակվող գերությունը, շինծու դատավարությունները և վերջերս կայացված ցմահ դատավճիռները լուրջ մարդասիրական խոչընդոտ են խաղաղության գործընթացում։ Նրանք ընդգծել են, որ այդ անձանց ազատ արձակումը կարող է դառնալ ԱՄՆ-ի կողմից իրականացվող ամենաարագ և արդյունավետ քայլերից մեկը՝ ցույց տալու համար, որ խաղաղության օրակարգը հիմնված է արդարության, ոչ թե միայն քաղաքական հարմարության վրա։
Բեգլարյանը և Ստեփանյանը կոչ են արել ԱՄՆ փոխնախագահին Բաքվում նախատեսվող քննարկումների ընթացքում անհայտ կորածների ճակատագրի հստակեցումը և բոլոր հայ գերիների ազատ արձակումը դարձնել առանցքային թեմաներ՝ որպես տարածաշրջանում արդար և արժանապատիվ խաղաղության հասնելու նախապայման։
Վենսը փետրվարի 9-11-ը կայցելի Հայաստան և Ադրբեջան, նրան է միանալու ԱՄՆ տնտեսական հարցերով փոխնախարար Ջեյքոբ Հելբերգը։
