Իրավապահ մարմիններն Ամենայն Հայոց կաթողիկոս Գարեգին Բ-ի դեմ «փողերի լվացման» մեղադրանքով նոր քրեական վարույթ են նախապատրաստում, հայտնել է «Հրապարակ» օրաթերթը` հղում անելով իր աղբյուրներին։
Ըստ թերթի՝ Քննչական կոմիտեում քննվող գործը վերաբերում է Մայր Աթոռի ֆոնդից «Շողակաթ» հեռուստաընկերության տնօրեն Մանյա Ղազարյանին հատկացված բնակարանին։ Ըստ իրավապահ մարմինների վարկածի՝ նշված անշարժ գույքի հետագա վաճառքի գործարքը որակվում է որպես վեհափառի իրականացրած ենթադրյալ հանցավոր գործունեություն, նշել է թերթը։
Լրատվականի տեղեկություններով՝ վարույթի շրջանակներում Ղազարյանն արդեն հարցաքննվել է՝ որպես վկա։ Նա հաստատել է քննչական մարմին հրավիրվելու փաստը, սակայն նշել, որ քրեական գործն անհիմն է և որևէ առնչություն չունի հեռուստաընկերության գործունեության հետ, նշել է լրատվականը։
Գլխավոր դատախազությունը դեռևս չի պատասխանել թերթի պաշտոնական հարցմանը։
ՀՀ վարչապետ Նիկոլ Փաշինյանն ամիսներ է՝ պահանջում է կաթողիկոսի հրաժարականը՝ հայտարարելով, որ նա զավակ ունի և խախտել է կուսակրոնության ուխտը։ Փաշինյանի հետ 10 եպիսկոպոսի հանդիպումից հետո, ովքեր ևս պահանջում են կաթողիկոսի հրաժարականը, ՀՀ իշխանություններն ուժեղացրել են եկեղեցու վրա ճնշումը։ Կառավարության որոշմամբ՝ պետական և համայնքային հողերն այլևս չեն փոխանցվի եկեղեցուն։ Կառավարությունը նաև լուծարել էր եկեղեցու հիմնադրած «Շողակաթ» հեռուստաընկերությունը, կան կալանավորված հոգևորականներ։
Հունվարի 5-ին Փաշինյանը և տասը եպիսկոպոս հանդես էին եկել հայտարարությամբ, որում ներկայացրել էին եկեղեցու բարենորոգման ճանապարհային քարտեզ և հայտնել Համակարգող խորհրդի ձևավորման մասին:
