Ղազախստանի Ակտաու օդանավակայանի մոտ կործանված «Ադրբեջանական ավիաուղիների» (AZAL) ինքնաթիռի նախնական զննման ժամանակ փորձագետները բազմաթիվ անցքեր են հայտնաբերել, հայտնում է ՏԱՍՍ-ը՝ հղում անելով Ղազախստանի տրանսպորտի նախարարության հրապարակած ավիավթարի պատճառների հետաքննության նախնական զեկույցին։
Ըստ հաղորդագրության՝ հայտնաբերվել են նաև օտար մետաղական առարկաներ։ Նշվում է, որ «օտար առարկաների միջոցով հասցված վնասի բնույթն ու ծագումը պարզելու համար կիրականացվեն համապատասխան ուսումնասիրություններ և փորձաքննություններ»։
Ըստ «Ինտերֆաքս»-ի՝ զեկույցը ներառում է լուսանկարներ, որոնք վկայում են ինքնաթիռի հիդրավլիկ համակարգերի վնասման մասին «մինչև գետնին հարվածելը, որը հավանաբար առաջացել է օդանավի բաղադրիչների մեջ արտաքին առարկաների ներթափանցման հետևանքով», ինչպես նաև «նախքան գետնին հարվածելը կայունացուցչի շարժիչի կառավարման էլեկտրական լարերի վնասը, որը հավանաբար առաջացել է արտաքին առարկաներից։
Զեկույցում նաև ասվում է, որ ինքնաթիռի անձնակազմը դիսպետչերին զեկուցել է խցիկին հարվածած թռչունների մասին, ինչպես նաև վթարից քիչ առաջ հայտնել է ինքնաթիռում թթվածնի բաքի հնարավոր պայթյունի և վառելիքի հոտի մասին։ Դիսպետչերները նաև զգուշացրել են անձնակազմին Գրոզնիում իրականացվող «Կարպետ» ծրագրի մասին։
Միաժամանակ Reuters-ը՝ վկայակոչելով ադրբեջանական կառավարական աղբյուրը, հայտնել է, որ ինքնաթիռը խոցվել է ռուսական «Պանցիր-Ս» հակաօդային պաշտպանության համակարգի կողմից։ Ըստ աղբյուրի՝ ադրբեջանական կողմն ունի «Պանցիր-Ս» հրթիռի բեկոր, որը դուրս է բերվել ինքնաթիռից և նույնականացվել միջազգային փորձագետների կողմից։
2024թ․ դեկտեմբերի 25-ին Բաքու-Գրոզնի չվերթն իրականացնող ադրբեջանական ավիաընկերության ինքնաթիռը վթարի էր ենթարկվել Ղազախստանի արևմտյան Ակտաու օդանավակայանի մոտ։ Ինքնաթիռում 62 ուղևոր և անձնակազմի 5 անդամ էին։ Ավիավթարի հետևանքով 38 մարդ էր մահացել, 29 փրկվածներ հոսպիտալացվել էին։
Ավելի ուշ ադրբեջանական և արևմտյան մի շարք լրատվամիջոցներ հայտնել էին, որ կործանման պատճառն արձակված ռուսական «երկիր-օդ» հրթիռն էր, որի բեկորները պայթել էին ինքնաթիռի կողքին։ Դեկտեմբերի 28-ին ՌԴ նախագահ Վլադիմիր Պուտինն Ադրբեջանի նախագահ Իլհամ Ալիևի հետ զրույցում ներողություն էր խնդրել ՌԴ օդային տարածքում AZAL ինքնաթիռի հետ կապված միջադեպի համար։ Դեկտեմբերի 29-ին Ալիևը Ռուսաստանից պահանջել էր ընդունել իր մեղքն ադրբեջանական ինքնաթիռի կործանման մեջ։
