ԱԺ-ն հավանություն է տվել ՀՀ ու Հոնկոնգի միջև եկամուտների կրկնակի հարկումը բացառելու նախագծին

Խորհրդարանի տնտեսական հարցերի հանձնաժողովը հավանություն է տվել Հայաստանի և Չինաստանի Հոնկոնգի հատուկ վարչական շրջանի միջև «Եկամուտների կրկնակի հարկումից խուսափելու և հարկերից խուսափելն ու շրջանցումը կանխելու մասին» համաձայնագրի վավերացման նախագծին։

Հիմնական զեկուցող, Հայաստանի ֆինանսների նախարար Վահե Հովհաննիսյանը նշել է, որ նախագիծը կարգավորում է պայմանավորվող պետությունների միջև առևտրատնտեսական հարաբերություններում ծագող հարկային խնդիրները։

Փաստաթուղթը, ըստ նրա, ունի երկու նպատակ․ վերացնել եկամտի կրկնակի հարկումը, ինչը նվազագույնի կհասցնի եկամտահարկի հետ կապված խոչընդոտների բացասական ազդեցությունը պայմանավորվող պետությունների միջև փոխադարձ առևտրի և ներդրումների վրա, ինչպես նաև ստեղծել կանխատեսելի և բարենպաստ ներդրումային միջավայր, նպաստել երկկողմ առևտրի և ներդրումների ներհոսքին։ 

Համաձայնագիրը ստորագրվել էր 2024 թվականի հուլիսի 24-ին՝ Երևանում։ Նույն թվականին նման պայմանագիր էր կնքվել Ճապոնիայի հետ։

«Փաստաթղթի ստորագրումը թույլ կտա զարգացնել ապրանքների և ծառայությունների շրջանառությունը, կապիտալի, տեխնոլոգիաների և մարդկանց տեղաշարժը Հայաստանի և Չինաստանի միջև և կնպաստի տնտեսական կապերի զարգացմանը»,- նշել է նախարարը։

2024 թվականի հուլիսի 18-ին Հայաստանում Չինաստանի դեսպանատան այն ժամանակվա ժամանակավոր հավատարմատար Չեն Մինգը հայտարարել էր, որ Պեկինի և Երևանի միջև ապրանքաշրջանառության ծավալը գերազանցել է պատմական ռեկորդը։ Նա մանրամասնել էր, որ Հայաստանի և Չինաստանի միջև ապրանքաշրջանառության ծավալը 2024 թվականի առաջին հինգ ամիսներին գերազանցել է 1,2 մլրդ դոլարը՝ տարվա կտրվածքով աճելով 54 տոկոսով։