Փետրվարի 7-ին Միլանում հիմնվել է «Իտալիայի և Հայաստանի միջև համագործակցության և զարգացման կենտրոն» ասոցիացիան, հաղորդում է Հայ գործարարների ասոցիացիան (AAP): Կենտրոնի ստեղծման արարողությունը տեղի է ունեցել ասոցիացիայի ներկայացուցիչների՝ Իտալիա կատարած այցի ընթացքում։
«Ասոցիացիան ստեղծվել է Իտալիայի Հանրապետության օրենսդրության պահանջներին համապատասխան՝ նպատակ ունենալով հետագայում վերածվել «Իտալա-հայկական առևտրի պալատի» և ներկայացուցչություն գրանցել Հայաստանում»,- ասվում է մամուլի հաղորդագրության մեջ։
Նշվում է, որ առևտրի պալատի կարգավիճակ ստանալուց հետո կազմակերպությանը հասանելի կլինի ձեռնարկությունների պաշտոնական ռեգիստրը։ Ասոցիացիայի հիմնադիրներն են General Invest-ի դիտորդական խորհրդի անդամ Ֆերդինանդո Պելացոն (Իտալիա), «Տաշիր» ընկերությունների խմբի առաջին փոխնախագահ Նարեկ Կարապետյանը և այլոք:
Ասոցիացիան նաև հայտնել է, որ իր ներկայացուցիչներն Իտալիա են այցելել «Տաշիր» ընկերությունների խմբի աջակցությամբ, այցի նպատակը երկու երկրների միջև առևտրային հարաբերությունների խթանումն ու Հայաստանի ներդրումային ու արտադրական հնարավորությունների ներկայացումն էր։
«Ինտենսիվ աշխատանքի արդյունքում հնարավոր եղավ ձևավորել իտալական ընկերությունների լայն բազա, որոնք հետաքրքրված են հայաստանյան շուկայի հետ աշխատելու գործում»,- նշվում է զեկույցում։
