«Միասնության թևեր» կուսակցությունը հայտնել է, որ Երևանի Րաֆֆու անվան թիվ 36 հիմնական դպրոցի ուսուցիչներին վարչական շրջանից հանձնարարել են գնալ Հանրապետության հրապարակ` ՔՊ-ի հավաքի, հակառակ դեպքում՝ գրել աշխատանքից ազատման դիմումներ։
Կուսակցությունից նշել են, որ նման բազմաթիվ ահազանգեր են ստանում։ «Տեղի է ունենում վարչական ռեսուրսի համատարած կիրառում։ Պետական և համայնքային հիմնարկների աշխատակիցներին, ուսուցիչներին, բուժաշխատողներին կամ այլ քաղաքացիների որևէ քաղաքական միջոցառման մասնակցելու պարտադրանքը օրենքի և մարդու հիմնարար իրավունքների կոպիտ խախտում է»,- ասվում է հայտարարության մեջ։
Մայիսի 26-ին կուսակցության վարչապետի թեկնածու Արման Թաթոյանը Հանրային հեռուստատեսությամբ հրապարակել էր աուդիոձայնագրություն, որտեղ լսվում է, թե ինչպես է Գեղարքունիքի մարզի Մարտունու քաղաքապետարանի կրթության վարչությունը հրավիրում մանկապարտեզների տնօրեններին և վախեցնում նրանց՝ ստիպելով մասնակցել «Քաղաքացիական պայմանագրի» գրասենյակի բացմանը:
