ՀՀ կառավարությունը չի նախատեսում զգալիորեն ավելացնել պաշտպանության ծախսերը 2026 թվականի պետական բյուջեում, ճեպազրույցի ժամանակ հայտարարել է վարչապետ Նիկոլ Փաշինյանը։
Նրա խոսքով՝ սա տրամաբանական է, գոնե այս պահին սա իր թիմի գնահատականն է։
«Մենք կշարունակենք օպերատիվ կերպով վերլուծել իրավիճակը, և մեր բոլոր որոշումները համարժեք կլինեն կարճաժամկետ, միջնաժամկետ և երկարաժամկետ զարգացումներին»,- հավելել է նա։
2024-ի սեպտեմբերին Ադրբեջանի ֆինանսների նախարարությունը հայտարարել էր հաջորդ տարի պաշտպանության և ազգային անվտանգության վրա մոտ 3,9 միլիարդ դոլար ծախսելու ծրագրերի մասին, որը կազմում է բյուջեի բոլոր ծախսերի 16,8%-ը: Նոյեմբերին Ադրբեջանի ֆինանսների նախարար Սամիր Շարիֆովը հայտնել էր, որ 2025 թվականին պաշտպանության ծախսերը կկազմեն գրեթե 5 միլիարդ դոլար։
Շարիֆովը պաշտպանական ծախսերի աճը բացատրել էր Հայաստանի քաղաքականությամբ, որը, ենթադրաբար, բաղկացած է «լայնածավալ ռազմականացումից»։ Ադրբեջանի խորհրդարանի խոսնակ Սահիբա Գաֆարովան ավելի ուշ 2025 թվականի բյուջեի առաջնահերթություն էր անվանել զինված ուժերի ներուժի զարգացումը։
2024-ի հոկտեմբերին Ադրբեջանի նախագահ Իլհամ Ալիևը Հայաստանին զգուշացրել էր «դադարեցնել վտանգավոր խաղերը»։ Նա երրորդ երկրներին կոչ էր արել հանգիստ թողնել Հարավային Կովկասը, «հանձնվել, գնալ և զբաղվել իրենց գործերով, իրենց խնդիրներով»։
