Իրանը ՄԱԿ-ի Անվտանգության խորհրդին նոր նամակ է ուղարկել, որտեղ ներկայացրել է Իսրայելի 12-օրյա ռազմական ագրեսիայի մանրամասները, հայտնում է IRNA գործակալությունը։
Նամակում, որը հասցեագրված է ՄԱԿ-ի գլխավոր քարտուղարին և Անվտանգության խորհրդին, ՄԱԿ-ում Իրանի դեսպան Ամիր Սաիդ Իրավանին հայտնել է, որ Իսրայելի օդային, հրթիռային և անօդաչու հարվածների հետևանքով զոհվել է 1100 խաղաղ բնակիչ, այդ թվում՝ 132 կին և 45 երեխա, ավելի քան 5700 մարդ վիրավորվել է։
«Հունիսի 13-ի վաղ առավոտյան, երբ իրանական ընտանիքները խաղաղ քնած էին, Իսրայելը համակարգված օդային, հրթիռային և անօդաչու թռչող սարքերով հարձակումներ է իրականացրել Իրանի բնակելի թաղամասերի, քաղաքացիական ենթակառուցվածքների և խաղաղ միջուկային օբյեկտների վրա»,- ասվում է նամակում։
Նշվում է նաև, որ Իսրայելն ստացել է լայնածավալ ռազմական, հետախուզական և քաղաքական աջակցություն ԱՄՆ-ից և որոշ արևմտյան երկրներից։
Իրանը պնդում է, որ այս հարձակումներն անհամաչափ և անօրինական են, և ՄԱԿ-ի անվտանգության խորհրդին կոչ է անում դատապարտել Իսրայելի գործողությունները և ձեռնարկել քայլեր՝ հետագա ագրեսիան կանխելու համար։
Իսրայելը հունիսի 13-ի գիշերը հարվածել էր Իրանին։ Նույն օրն Իրանը բալիստիկ հրթիռների կիրառմամբ պատասխան հարվածներ էր հասցրել Իսրայելին։ ԱՄՆ-ն հունիսի 22-ն, իր հերթին, հարվածներ էր հասցրել Իրանի երեք միջուկային օբյեկտի։ Հունիսի 23-ի ուշ երեկոյան Իրանը հրթիռներ էր արձակել Կատարում տեղակայված ամերիկյան ռազմաբազաների ուղղությամբ։ Մեկ օր անց՝ հունիսի 24-ին, ԱՄՆ նախագահը հայտնել էր, որ Թեհրանի և Թել Ավիվի միջև հրադադարն ուժի մեջ է մտել։
Հուլիսի 7-ին ԶԼՄ-ները հայտնել էին, որ Իսրայելը պատրաստվում է Իրանի դեմ հնարավոր նոր ռազմական գործողությունների, եթե Թեհրանը փորձի վերսկսել միջուկային ծրագիրը։
