TRIPP («Թրամփի երթուղի հանուն միջազգային խաղաղության և բարգավաճման») նախագծի ֆինանսավորումը կարող է իրականացվել ադրբեջանական կապիտալի հաշվին՝ 74% մասնաբաժնի շրջանակներում, գրել է ԱԺ «Պատիվ ունեմ» խմբակցության ղեկավար Հայկ Մամիջանյանը՝ հղում անելով Ադրբեջանի պետական նավթային հիմնադրամի և ամերիկյան մի շարք կազմակերպությունների միջև կնքված համաձայնագրին։
Ադրբեջանական հիմնադրամը հունվարի 21-ին Դավոսի համաշխարհային տնտեսական ֆորումի շրջանակներում երկարաժամկետ ռազմավարական գործընկերային պայմանավորվածություններ էր ստորագրել Brookfield Asset Management-ի, BlackRock-ի և Global Infrastructure Partners-ի (GIP) հետ: Նախատեսվում է համագործակցություն, այդ թվում՝ ենթակառուցվածքների զարգացման և լոգիստիկայի ոլորտներում։
«Ո՞րն է երաշխիքը, որ հենց այս խողովակով Ադրբեջանն իր մասնաբաժինը չի ստանա TRIPP կառուցապատման իրավունք ստացող ընկերության ամերիկյան բաժնեմասի 74%-ի մեջ»,- նշել է պատգամավորը։
Համաձայնագրերն ուղղված են գոյություն ունեցող հարաբերությունների ընդլայնմանը մինչև համագործակցության կառուցվածքային լայնածավալ ձևաչափեր, որոնք հնարավորություններ են բացում զգալի ներդրումային հոսքերի և ենթակառուցվածքների, թվային տեխնոլոգիաների և վերականգնվող էներգետիկայի ոլորտներում փորձաքննության ներգրավման համար: Փոխըմբռնման հուշագրի համաձայն՝ SOFAZ-ը և նրա գործընկերները նախատեսում են առաջիկա 3-4 տարիների ընթացքում ուսումնասիրել ներդրումների և համաֆինանսավորման հնարավորությունները:
Նախաձեռնությունները կկենտրոնանան Ադրբեջանի տնտեսական աճի համար ռազմավարական նշանակություն ունեցող ոլորտների վրա, ներառյալ՝ թվային ու ֆինանսական ենթակառուցվածքները, տվյալների կենտրոնները, տրանսպորտը և լոգիստիկան, էներգետիկ անցումը և վերականգնվող էներգետիկան, անշարժ գույքը, ինչպես նաև օդանավակայանի ենթակառուցվածքները: Ակնկալվում է, որ նախագծերը կսպասարկեն ոչ միայն Ադրբեջանի ներքին շուկան, այլև տարածաշրջանային ավելի լայն շուկան:
SOFAZ-ը, որը հիմնադրվել է 1999 թվականին՝ Ադրբեջանի նավթից և գազից ստացվող եկամուտները կառավարելու համար, ներկայումս ակտիվներ ունի ավելի քան 60 երկրում: Նրա պորտֆելը ներառում է հանրային ընկերությունների բաժնետոմսեր, ենթակառուցվածքային նախագծեր և վերականգնվող էներգիայի ներդրումներ: Brookfield Asset Management-ը կառավարում է ավելի քան 1 տրիլիոն դոլար արժողությամբ ակտիվներ ամբողջ աշխարհում ենթակառուցվածքների, վերականգնվող էներգետիկայի, ուղղակի ներդրումների, անշարժ գույքի և վարկավորման ոլորտներում ՝ ունենալով բարդ նախագծերի մասշտաբավորման մեծ փորձ: BlackRock-ը վերահսկում է մոտ 14 տրիլիոն դոլարի ակտիվներ, գործում է 38 երկրում և ունի կապիտալի տեղաբաշխման և ռիսկերի կառավարման զգալի հնարավորություններ: GIP-ը մասնագիտանում է ենթակառուցվածքային ներդրումների մեջ, ներառյալ՝ օդանավակայանի խոշոր ակտիվները, ինչպիսիք են Լոնդոնի Գաթվիկը և Էդինբուրգը, ինչպես նաև տվյալների զանգվածային կենտրոնները:
ՀՀ ԱԳ նախարար Արարատ Միրզոյանը և ԱՄՆ պետքարտուղար Մարկո Ռուբիոն հունվարի 13-ին Վաշինգտոնում ստորագրել էին TRIPP նախագծի իրականացման մասին հռչակագիրը: Նախաձեռնության իրականացման համար կստեղծվի TRIPP զարգացման ընկերությունը, որտեղ բաժնետոմսերի 74%-ը կստանա ԱՄՆ-ն՝ նախնական ներդրումների դիմաց, իսկ 26%-ը՝ Հայաստանը: Այս հռչակագրով Հայաստանը պարտավորվում է առանձին ընթացակարգեր մշակել Ադրբեջանի և Նախիջևանի միջև մարդկանց, տրանսպորտի և ապրանքների տեղափոխման համար։
