Ռուսաստանի և ԱՄՆ-ի նախագահների՝ Վլադիմիր Պուտինի և Դոնալդ Թրամփի հանդիպումը Բուդապեշտում պահանջում է մանրակրկիտ նախապատրաստություն, հայտարարել է Կրեմլի մամուլի խոսնակ Դմիտրի Պեսկովը, հաղորդում է «ՌԻԱ Նովոստի»-ն:
«Ժամկետներն իրականում դեռևս չեն որոշվել․ դա դեռ առջևում է, սակայն մինչ այդ անհրաժեշտ է մանրակրկիտ նախապատրաստություն, և դրա համար ժամանակ է պետք»,- ասել է նա լրագրողներին։
Պեսկովն ընդգծել է, որ գագաթնաժողովի անցկացումը երկու նախագահների փոխադարձ ցանկությունն է, սակայն դրա կազմակերպման շուրջ տարածվել են բազմաթիվ լուրեր և շահարկումներ։
«Իրականությանը դրանք մեծամասամբ չեն համապատասխանում»,- ավելացրել է նա։
Պեսկովի կարծիքով՝ ստեղծված դադարն իրապես պահանջում է միջամտություն բարձր մակարդակով, սակայն այդ միջամտությունը պետք է լավ նախապատրաստվի։
Հոկտեմբերի 16-ին Պուտինը և Թրամփը հեռախոսազրույց էին ունեցել, թեման Ուկրաինայի հարցի կարգավորումն էր։ Զրույցից հետո առաջնորդները համաձայնել էին հանդիպել առաջիկա երկու շաբաթվա ընթացքում, սակայն ճշգրիտ ամսաթիվը չէր հայտարարվել։ Բուդապեշտն ընտրվել էր որպես հանդիպման վայր։
Թրամփի վարչակազմի պաշտոնյաներից մեկը «Ռիա Նովոստիին» հայտնել էր, որ մոտ ապագայում նման հանդիպում նախատեսված չէ։ Հունգարիայի վարչապետ Վիկտոր Օրբանը, սակայն, այսօր տեղեկացրել է, որ գագաթնաժողովի նախապատրաստական աշխատանքները շարունակվում են։
