ԱՄՆ նախագահ Դոնալդ Թրամփը Սպիտակ տանն իր նախորդի՝ Ջո Բայդենի դիմանկարը փոխարինել է Բայդենի ստորագրությունն ավտոմատ դնող սարքի լուսանկարով։
ԱՄՆ նախագահի օգնական Մարգո Մարտինի կողմից X-ում տեղադրված տեսանյութում ցուցադրվել են Սպիտակ տան արևմտյան թևում գտնվող ԱՄՆ վարչակազմի ղեկավարների պաշտոնական դիմանկարները։ Գործող առաջնորդի, որն ԱՄՆ նախագահն էր նաև 2017-2021 թվականներին, դիմանկարների միջև տեղադրվել է Բայդենի ստորագրությունը թղթի վրա տպելու համար օգտագործվող գրիչի շրջանակված լուսանկար։ Սպիտակ տան պաշտոնական Facebook-ի էջում տեղադրվել է նաև Թրամփի դիմանկարներով լուսանկար՝ կենտրոնում Բայդենի ստորագրությամբ գրիչի լուսանկարով։
Հուլիսին Սպիտակ տունը հետաքննություն էր սկսել Բայդենի կողմից փաստաթղթեր ստորագրելու համար հատուկ գրիչ օգտագործելու վերաբերյալ: Բայդենը, ով նախագահ էր 2021-2025 թվականներին, նախկինում The New York Times-ին տված հարցազրույցում խոստովանել էր, որ իր անունից ներում ստորագրելու համար ավտոմատ գրիչ է օգտագործվել: Այնուամենայնիվ, նա պնդել էր, որ ներման բոլոր որոշումները կայացվել են անձամբ իր կողմից, և որ տվյալ գրիչի օգտագործումը անհրաժեշտ էր փաստաթղթերի մեծ քանակի պատճառով։
Հունիսի 5-ին Թրամփը հրամայել էր հետաքննություն սկսել իր նախորդի առողջության և Բայդենի օգնականների կողմից փաստաթղթեր ստորագրելու համար ավտոմատ գրիչ օգտագործելու վերաբերյալ: Թրամփը նախկինում հայտարարել էր, որ Բայդենի կողմից մոտ 2500 անձանց, այդ թվում՝ իր հարազատների, ներումն անվավեր է, քանի որ դրանք ստորագրվել են ավտոմատ գրիչով՝ առանց նախկին նախագահի իմացության:
