ԱՄՆ նախագահ Դոնալդ Թրամփը հայտարարել է, որ Իսրայելն այլևս հարված չի հասցնի Կատարին՝ նախորդ շաբաթ Դոհայում ՀԱՄԱՍ-ի ղեկավարներին թիրախավորած հարվածից հետո, հայտնում է Times of Israel-ը:
Լրագրողների հարցին՝ արդյոք Իսրայելի վարչապետ Բենյամին Նեթանյահուն իրեն որևէ երաշխիք տվե՞լ է, որ նոր հարված չի լինի Կատարին, Թրամփը պատասխանել է․ «Նա չի հարվածի Կատարին»։
ԱՄՆ նախագահը կրկին ընդգծել է, որ Դոհան «շատ լավ դաշնակից է, և շատերը դա չգիտեն»։
«Նեթանյահուն Կատարին չի հարվածի, բայց հնարավոր է՝ գնա ՀԱՄԱՍ-ի հետևից այլ վայրերում»,- ավելացրել է Թրամփը:
Թրամփը մեկնաբանել է նաև Axios-ի հրապարակումը, որտեղ անանուն իսրայելցի պաշտոնյաներ պնդել էին, թե Նեթանյահուն նախօրոք տեղեկացրել է նրան Դոհայի հարվածի մասին՝ հնարավորություն տալով ԱՄՆ-ին այն կանգնեցնել։ Սպիտակ տան ղեկավարը հերքել է այդ տեղեկությունը՝ պնդելով, որ հարվածի մասին իրեն տեղեկացրել են միայն այն պահին, երբ արդեն ուշ էր որևէ բան փոխելու համար։
Սեպտեմբերի 9-ին Իսրայելն ավիահարված էր հասցրել ՀԱՄԱՍ-ի ղեկավարությանը Դոհայում։ Իսրայելցի պաշտոնյաները հայտարարել էին, որ հարվածն ուղղված էր շարժման բարձրագույն ղեկավարության դեմ։ Դոհայում Արաբական լիգայի և Իսլամական համագործակցության կազմակերպության գագաթնաժողովի մասնակիցները կոչ էին արել վերանայել Իսրայելի հետ դիվանագիտական և տնտեսական հարաբերությունները՝ Կատարին Իսրայելի կողմից իրականացված օդային հարվածից հետո։
