Նոր փուլ է սկսվում համաշխարհային պատմության մեջ, հայտարարել է Ռուսաստանի նախագահ Վլադիմիր Պուտինը «Ուժեղ գաղափարներ նոր ժամանակի համար» համաժողովում: Այս մասին գրում է rbc.ru-ն։
Նախագահը նշել է, որ աշխարհի հեռացող միաբևեռ համակարգը դարձել է դրա զարգացման արգելակը։ «Ոսկե միլիարդի տոտալ գերիշխանության մոդելը», Պուտինի խոսքով, անարդար է, այն ժողովուրդներին բաժանում է «առաջին և երկրորդ սորտի», ուստի «ռասիստական և նեոգաղութատիրականլ է իր էությամբ»: Այդ մոդելի հիմքում ընկած «լիբերալ, գլոբալիստական գաղափարախոսությունը», կարծում է նախագահը, «ձեռք է բերում տոտալիտարիզմի գծեր» և զսպում է պատմական ազատ արարումը: «Ոսկե միլիարդի» էլիտաները «խուճապահար վախենում են, որ համաշխարհային զարգացման մյուս կենտրոնները կարող են ներկայացնել զարգացման իրենց տարբերակները»,- նշել է Պուտինը:
«Որքան էլ արևմտյան, և այսպես կոչված, «վերազգային էլիտաները» փորձեն պահպանել իրերի գոյություն ունեցող կարգը, նոր դարաշրջան է սկսվում, նոր փուլ համաշխարհային պատմության մեջ, և միայն իսկական ինքնիշխան պետությունները կարող են աճի բարձր դինամիկա ապահովել»,- հայտարարել է նա:
Պուտինը հստակեցրել է, որ «ինքնիշխանությունն ազգային զարգացման ազատությունն է»: Նա կարծում է, որ ինքնիշխան պետությունները օրինակ կծառայեն ուրիշների համար «մարդկանց կյանքի որակի, ավանդական արժեքների պաշտպանության, բարձր հումանիստական իդեալների» չափանիշներով, որտեղ մարդը դառնում է «ոչ թե միջոց, այլ բարձրագույն նպատակ»։
