Ուկրաինայի նախագահ Վլադիմիր Զելենսկին շաբաթ առավոտյան դիմել է ուկրաինացիներին և հայտարարել, որ նախկինի պես մնում է մայրաքաղաքում, իսկ ուկրաինական բանակը չի պատրաստվում վայր դնել զենքը, հաղորդում է ТАСС-ը:
«Հիմա համացանցում շատ կեղծ տեղեկություններ են հայտնվել, թե իբր ես մեր բանակին կոչ եմ անում վայր դնել զենքն ու տարհանում է տեղի ունենում։ Ես այստեղ եմ, ոչ մի զենք վայր չենք դնի և կպաշտպանենք մեր պետությունը»,- ասել է նա իր տեսաուղերձում՝ գտնվելով Կիևի բանկային փողոցում՝ իր գրասենյակի մոտ:
Փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր, որ որոշում է կայացրել Ուկրաինայի ապառազմականացման հատուկ ռազմական գործողության մասին: Ռուսաստանցիներին ուղղված հեռուստաուղերձում նա հայտարարել է, որ հանգամանքները «մեզանից պահանջում են վճռական և անհապաղ գործողություններ, Դոնբասի ժողովրդական հանրապետությունները դիմել են Ռուսաստանին՝ օգնության խնդրանքով»:
Ուկրաինայի նախագահ Վլադիմիր Զելենսկին Ռուսաստանին մեղադրել է երկրի ռազմական ենթակառուցվածքների վրա հարձակվելու մեջ և երկրի ամբողջ տարածքում ռազմական դրություն է մտցրել՝ խզելով դիվանագիտական հարաբերությունները Ռուսաստանի հետ:
Փետրվարի 25-ին Զելենսկին ՌԴ նախագահ Վլադիմիր Պուտինին առաջարկել է բանակցություններ վարել։ Նույն օրը Պուտինը ՉԺՀ-ի նախագահ Սի Ցզինպինի հետ զրույցում հայտարարել է, որ Ռուսաստանը պատրաստ է Ուկրաինայի հետ բարձր մակարդակի բանակցություններ վարել: Ուկրաինայի նախագահի մամուլի քարտուղար Սերգեյ Նիկիֆորովն էլ հայտարարել է, որ Ուկրաինան պատրաստ է բանակցությունների և կողմերը խորհրդակցում են բանակցությունների անցկացման վայրի և ժամանակի վերաբերյալ:
