Ռուսաստանի արտաքին գործերի նախարար Սերգեյ Լավրովը Պարսից ծոցի արաբական պետությունների համագործակցության խորհրդի երկրների արտգործնախարարների հետ տեսակոնֆերանսի ժամանակ հայտարարել է այդ երկրներին օտար պատերազմի մեջ ներքաշելու անթույլատրելիության մասին, ասվում է ՌԴ ԱԳՆ հաղորդագրության մեջ։
«Ռուսաստանի անփոփոխ աջակցությունն է արտահայտվել բարեկամ արաբական միապետությունների ինքնիշխանությանն ու տարածքային ամբողջականությանը, որոնց հետ հարաբերությունները ռազմավարական բնույթ են կրում։ Շեշտվել է այդ երկրներին օտար պատերազմի մեջ ներքաշելու անթույլատրելիությունը, նրանց քաղաքացիական ենթակառուցվածքների, այդ թվում՝ էներգետիկ և այլ կենսական նշանակության օբյեկտների վրա հարձակումների անթույլատրելիությունը»,- նշել են դիվանագիտական գերատեսչությունում։
Լավրովն ընդգծել է, որ Մոսկվան կոչ է անում անհապաղ դադարեցնել կրակը տարածաշրջանում և գտնել հակամարտության կարգավորման քաղաքական-դիվանագիտական ուղիներ:
Բացի այդ, Լավրովը հաստատել է արաբ գործընկերների հետ, այդ թվում՝ ՄԱԿ-ի հարթակում, սերտ համակարգումը պահպանելու ամուր տրամադրվածությունը՝ նպատակ ունենալով նպաստել կրակի արագ դադարեցմանը և թույլ չտալ հակամարտության աշխարհագրության ընդլայնում:
ԱՄՆ-ն ու Իսրայելը փետրվարի 28-ին լայնածավալ ռազմական գործողություն էին սկսել Իրանի դեմ: Հարվածների թիրախում էին Իրանի միջուկային օբյեկտները, ինչպես նաև երկրի ռազմական ենթակառուցվածքները: Գործողության արդյունքում զոհվել էին Իրանի բարձրաստիճան զինվորականներ և պաշտոնյաներ, այդ թվում՝ Իրանի հոգևոր առաջնորդ Ալի Խամենեին:
Իրանն ի պատասխան՝ հարվածներ էր հասցրել տարածաշրջանի մի շարք երկրներում ԱՄՆ-ի և Իսրայելի թիրախներին: Հարվածներ էին հասցվել Բահրեյնում, Հորդանանում, Կատարում, Քուվեյթում, Արաբական Միացյալ Էմիրություններում և Սաուդյան Արաբիայում գտնվող ամերիկյան ռազմակայաններին ու դիվանագիտական ներկայացուցչություններին:
