ԱՄՆ հետախուզությունը կարծում է, որ Իրանի գերագույն առաջնորդ Ալի Խամենեին վախենում էր որդու՝ Մոջթաբա Խամենեիի հնարավոր իշխանության գալուց, հաղորդում է CBS News-ը՝ հղում անելով աղբյուրներին։
Հեռուստաալիքի տվյալներով՝ այս հետախուզական տվյալները ներկայացվել են ԱՄՆ նախագահ Դոնալդ Թրամփին և նրա մերձավոր շրջապատին, այդ թվում՝ փոխնախագահ Ջեյ Դի Վենսին։
CBS-ի աղբյուրները պնդում են, որ Խամենեին որդուն համարել է «ոչ բավարար կարողունակ» և ոչ համապատասխան Գերագույն առաջնորդի դերի համար։ Նա նաև տեղյակ էր որդու անձնական կյանքի խնդիրների մասին։ 2004 թվականին Մոջթաբա Խամենեին ամուսնացել էր Զահրա Հադդադ-Ադելի՝ Իրանի խորհրդարանի նախկին խոսնակ Ղոլամ Ալի Ադելի դստեր հետ։ Այլ մանրամասներ այս թեմայով հայտնի չեն
Թեհրանի վրա ԱՄՆ-իսրայելական հարձակման հետևանքով Ալի Խամենեիի մահից հետո իրավահաջորդը դարձել է նրա 56-ամյա որդին:
CBS-ի տվյալներով՝ Թրամփը մասնավոր զրույցներում ընդունել է, որ վստահ չէ, թե որքանո՞վ է հավաստի նախկին Գերագույն առաջնորդի որդու մասին տեղեկությունները։ Սակայն, մարտի 12-ին Fox News-ին տված հարցազրույցում, նա հայտարարել էր, որ Իրանի նոր Գերագույն առաջնորդը «հավանաբար ողջ է, բայց վիրավոր է»։
New York Times-ը, հղում անելով երեք իրանցի պաշտոնյայի, հաղորդել էր, որ Մոջթաբա Խամենեին վնասվածքներ էր ստացել, այդ թվում՝ ոտքերի շրջանում, բայց ողջ է մնացել և թաքնվում է։
Թրամփը նաև հայտարարել էր, որ Մոջթաբա Խամենեիի թեկնածությունը համարում է «անընդունելի»։ Նա ասել էր, որ Իրանի փորձագետների ժողովը «վատնում է իր ժամանակը», իսկ Խամենեիի որդին «թեթև քաշ ունեցող» է։
Շարունակվող հակամարտության ֆոնին Իրանի արտաքին գործերի նախարար Աբբաս Արաղչին հայտարարել է, որ Թեհրանը որևէ պատճառ չի տեսնում ԱՄՆ-ի հետ բանակցելու համար։
«Մենք երբեք չենք խնդրել հրադադար կամ նույնիսկ բանակցություններ»,- ասել է նա CBS News-ին։
Արաղչիի խոսքով՝ Իրանը մտադիր է շարունակել ինքնապաշտպանությունն «այնքան ժամանակ, որքան անհրաժեշտ է»։ Նա հակամարտությունն անվանել է «նախագահ Թրամփի և Միացյալ Նահանգների համար նախընտրելի պատերազմ» և նշել, որ Թեհրանը չի վստահում Վաշինգտոնի հետ բանակցություններին։
Արաղչին նշել է, որ Իրանն արդեն բանակցություններ էր վարում ԱՄՆ-ի հետ, երբ նրանք որոշել են հարվածել՝ նշելով, որ Թեհրանը Վաշինգտոնի հետ երկխոսության դրական փորձ չունի։ Նրա խոսքով՝ եթե բանակցություններն արդեն ընթանում էին, և դրան հաջորդել էր հարձակումը, ապա բանակցություններին վերադառնալն իմաստ չունի։
ԱՄՆ-ն և Իսրայելը փետրվարի 28-ից ի վեր հարվածներ են հասցնում Իրանին։ Հարձակումների հետևանքով զոհվել են բարձրաստիճան պաշտոնյաներ, այդ թվում՝ Գերագույն առաջնորդ Ալի Խամենեին։ Թեհրանը պատասխանել է՝ տարածաշրջանում ԱՄՆ-ի և Իսրայելի թիրախներին հարվածներ հասցնելով։
