Ռասիզմի դեպքում Հայաստանի ֆուտբոլի ազգային հավաքականի և «Կրասնոդարի» կիսապաշտպան Էդուարդ Սպերցյանը կարող է մոռանալ եվրոպական կարիերայի մասին, հայտարարել է Մախաչկալայի «Անժիի» նախկին հարձակվող, ներկայումս «Լեգիոն Մախաչկալայի» նախագահ Շամիլ Լախիյալովը՝ մեկնաբանել է Ռուսաստանի Պրեմիեր լիգայի 11-րդ տուրի՝ «Կրասնոդարի» և «Ախմատի» միջև կայացած հանդիպման ժամանակ Սպերցյանի և Ուսման Նդոնգի միջև տեղի ունեցած միջադեպը։
Հոկտեմբերի 4-ին Ռուսաստանի Պրեմիեր լիգայի 11-րդ տուրում «Կրասնոդարը» 2:0 հաշվով հաղթել էր «Ախմատին»։ Նդոնգը խաղադաշտից հեռացվել էր 86-րդ րոպեին՝ Սպերցյանի հետ բախման արդյունքում, ով դրանից հետո դեղին քարտ էր ստացել: Հոկտեմբերի 5-ին «Ախմատը» հանդես էր եկել հայտարարությամբ՝ ի պաշտպանություն Նդոնգի։ Գրոզնիի ակումբում պահանջել էին նաև հետաքննություն անցկացնել Սպերցյանի նկատմամբ և պատիժ սահմանել «ռասիստական գործողությունների» համար:
Լախիյալովը նշել է, որ այս պահին դժվար է ասել՝ արդյոք Սպերցյանն իրականում նման բան ասե՞լ է, քանի որ դա ապացուցելը բարդ է։ Նա նշել է, որ, իր կարծիքով, Սպերցյանը կարող էր սադրել Նդոնգին։ Միևնույն ժամանակ՝ Լախիյալովն ընդգծել է, որ եթե ռասիստական արտահայտության փաստը հաստատվի, ապա այդպիսի արարքը կարող է լուրջ վնաս հասցնել Սպերցյանի կարիերային, հատկապես՝ եվրոպական ակումբներում, և նրա նկատմամբ պետք է կիրառվի առավել խիստ պատիժ։
«Եթե Սպերցյանն ասում է, որ մեծացել է Կովկասում, թող բացատրի՝ Կովկասի ո՞ր մասում են սովորեցնում, որ թեթև հպումից հետո ընկնել գետնին և սիմուլյացիայի դիմել։ Իսկ եթե պարզվի, որ նա իսկապես օգտագործել է ռասիստական արտահայտություն, ապա, իմ կարծիքով, կարելի է մոռանալ նրա եվրոպական կարիերայի մասին, և ներքին առաջնությունում պատիժը պետք է լինի հնարավորինս խիստ»,- Լախիյալովի խոսքերն է մեջբերում Euro-Football.ru-ն։
Սպերցյանն անընդունելի էր համարել Գրոզնիի «Ախմատի» սենեգալցի պաշտպան Ուսման Նդոնգի նկատմամբ ռասիստական պահվածքի վերաբերյալ իր հասցեին հնչեցրած մեղադրանքները և հորդորել էր ուսումնասիրել տեսախցիկները։
