19 հազար բռնի տեղահանված քաղաքացի է Լեռնային Ղարաբաղից Կոռնիձորով մուտք է գործել Հայաստան, ուղիղ հեռարձակմամբ ասել է Հայաստանի փոխվարչապետ, Կառավարության հումանիտար կենտրոնի համակարգող Տիգրան Խաչատրյանը։
«2500-ը ապահովվել է կեցավայրով, 1000-ը` Սյունիքում, 500-ը` Վայքում, մոտ 500-ը` Գեղարքունիքում: Այս օրերին տեղակայումն ընթանում է Տավուշում»,- նշել է նա։
Նրա խոսքով՝ նախապատրաստական աշխատանքներ են տարվում Լեռնային Ղարաբաղի քաղաքացիներին Հայաստանում տեղավորելու համար, հյուրատների և հյուրանոցների գույքագրում է իրականացվում նաև հանրապետության այլ մարզերում։ Ժամանածներից շատերն ասել են, որ կացարան ունեն։ Սակայն նրանց աջակցություն կտրամադրվի կրթության, առողջապահության և կենսապայմանների բարելավման հարցերում, հավելել է Խաչատրյանը։
Սեպտեմբերի 19-ին Ադրբեջանը լայնամասշտաբ հարձակում էր սկսել Արցախի Հանրապետության նկատմամբ։ Վերջին տվյալներով` կա 200 զոհ և 400 վիրավոր։ Ադրբեջանի պաշտպանության նախարարությունը հայտարարել էր ԼՂ-ում զինված գործողություն սկսելու մասին։ Ադրբեջանի ՊՆ-ն նշել էր, որ, իբր, քաղաքացիական բնակչությունը և քաղաքացիական ենթակառուցվածքի օբյեկտները թիրախ չեն, շարքից հանվում են միայն «ռազմական թիրախները»:
ԼՂ-ում տեղակայված ռուսական խաղաղապահ զորակազմի հրամանատարության միջնորդությամբ պայմանավորվածություն էր ձեռք բերվել 2023 թվականի սեպտեմբերի 20-ի ժամը 13:00-ից մարտական գործողություններն ամբողջությամբ դադարեցնելու մասին:
Ըստ համաձայնության՝ սեպտեմբերի 21-ին հանդիպում էր տեղի ունեցել Եվլախում։ Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը հայտարարել էր, որ Եվլախում տեղի ունեցած բանակցությունները կարող են հանգեցնել Բաքվի և Երևանի միջև խաղաղության պայմանագրի կնքմանը։ Սեպտեմբերի 21-ին՝ ավելի ուշ, պաշտոնական Ստեփանակերտը հայտարարել էր, որ գործնական մթնոլորտում անցած հանդիպման ընթացքում քննարկվել են երկուստեք կարևորություն ունեցող մի շարք հարցեր: Ըստ Ստեփանակերտի՝ կողմերը հատուկ ընդգծել են, որ առկա բոլոր հարցերն անհրաժեշտ է քննարկել խաղաղ մթնոլորտում՝ հանդիպումները շարունակելու պատրաստակամությամբ։
