Կառավարության մարտի 16-ի նիստում ՀՀ վարչապետ Նիկոլ Փաշինյանը հայտնեց, որ մի շարք հանձնարարականներ է տվել Արտաքին գործերի նախարարությանը: Մասնավորապես՝ առանձնացրել է միջազգային փաստահավաք առաքելության գործուղումն Արցախ և փախստականների ու ներքին տեղանահանվածների վերադարձի ու գույքային իրավունքների հարցերը:
Միջազգային փաստահավաք առաքելության գործուղումը Արցախ
ՀՀ վարչապետ Նիկոլ Փաշինյանը կառավարության նիստի ժամանակ հայտարարեց, որ շարունակվում են աշխատանքները միջազգային փաստահավաք առաքելություն Արցախ գործուղելու ուղղությամբ: Ըստ նրա՝ դա հնարավորություն կտա վերջ դնել Ադրբեջանի պնդումներին, թե ՀՀ-ն Արցախում բանակ ունի ու ռազմական փոխադրումներ է անում դեպի ԼՂ:
«Այս պնդումներն անհիմն են, Ադրբեջանը փորձում է դա տարածաշրջանում նոր ռազմական էսկալացիայի պատրվակ դարձնել»,- ասաց վարչապետը՝ նշելով, որ եթե ՌԴ խաղաղապահ առաքելությունը օբյեկտիվ պատճառներով չի կարող ապահովել ԼՂ անվտանգությունը, ապա հենց ինքը պետք է դիմի ՄԱԿ-ի ԱԽ՝ միջազգային մեխանիզմներ գործարկելու խնդրանքով: Միևնույն ժամանակ Լաչինի միջանցքի շրջափակման հետևանքով ստեղծված ճգնաժամի՝ աղետի չվերածվելու համար Փաշինյանը շնորհակալություն հայտնեց ՌԴ-ին՝ գործադրված ջանքերի համար:
Փախստականների վերադարձը և գույքային պահանջները
Ադրբեջանն ամեն ինչ անում է Բաքու-Ստեփանակերտ երկխոսությունը վիժեցնելու համար, ասաց Փաշինյանը կառավարության նիստի իր ելույթում:
«Ընդամենը 2 հանդիպումից հետո Ադրբեջանը հայտարարում է, թե ԼՂ հայերի հետ քննարկելու է վերաինտեգրման թեման: Մինչդեռ, միջազգային պայմանավորվածությունն այն է, որ քննարկամն թեման պետք է լինի ԼՂ ժողովրդի իրավունքների և անվտանգության մասին»,- նշեց երկրի ղեկավարը:
Փաշինյանն ասաց, որ նոյեմբերի 9-ի հայտարարության 7 կետի համաձայն՝ հանձնարարել է ԱԳ նախարարությանը պաշտոնական բանակցություններ սկսել ՄԱԿ-ի փախստականների հարցերով գլխավոր հանձնակատարի հետ: Սա պետք է ենթադրի Շուշիի, Հադրութի, Մարտակերտի, Մարտունու, Շահումյանի, Գետաշենի, Լաչինի և հարակից այլ շրջանների հայերի վերադարձի միջազգային մեխանիզմների գործարկում:
«Այս կապակցությամբ պետական մարմինների են դիմում նաև Բաքվի, Շիրվանի, Սումգայիթի, Կիրովաբաթի, Խանլարի, Շամխորի, Նախիջևանի և Ադրբեջանի այլ շրջանների էթնիկ զտման ենթարկված հայության ներկայացուցիչներ, թե ինչու իրենց տներ վերադառնալո հարցը չենք բարձրացնում: Խնդիրն այն է, որ 7-րդ կետը վերադառնում է ԼՂ և հարակից շրջանի և ներքին տեղահանվածներին»,- ասաց Փաշինյանը՝ շեշտելով, որ ոչինչ չի խանգարում, որ այդ մարդիկ ինքնակազմակերպվեն ու իրենց գույքային, վերադարձի և այլ իրավունքները պաշտպանեն միջազգային ատյաններում:
