Ադրբեջանն ընտրվել է ՄԱԿ-ի կրթության, գիտության և մշակույթի հարցերով միջկառավարական կոմիտեի (ՅՈՒՆԵՍԿՕ) անդամ՝ 2025-2029թթ. մշակութային արժեքների վերադարձին նպաստելու համար, հայտնում են ադրբեջանական ԶԼՄ-ները՝ հղում անելով երկրի ԱԳՆ-ին:
Որոշումը կայացվել է կազմակերպության Գլխավոր համաժողովի 43-րդ նստաշրջանում:
Կոմիտեն զբաղվում է մշակութային օբյեկտների վերականգնման հարցերով՝ դրանց ծագման երկրներին և ապօրինի յուրացման դեպքերի կարգավորմամբ։ Բաքվում ընտրությունն անվանել են «մշակութային ժառանգության պաշտպանության գործում ավանդի միջազգային ճանաչում»:
2023 թվականի սեպտեմբերին Լեռնային Ղարաբաղն Ադրբեջանի վերահսկողության տակ անցնելուց հետո միջազգային իրավապաշտպան կառույցներն ու հայկական կազմակերպությունները բազմիցս հայտնել են կրոնական, պատմական և մշակութային հուշարձանների ոչնչացման փաստերի մասին։ 2020-2023 թվականներին նմանատիպ մեղադրանքներ էին հնչել նաև նախորդ ռազմական գործողությունների ընթացքում Բաքվի վերահսկողության տակ անցած տարածքներում գերեզմանատների, եկեղեցիների և խաչքարերի ոչնչացման վերաբերյալ։
Armenia Today-ի մոնիթորինգի տվյալներով՝ վերջին 1,5 տարվա ընթացքում ավերվել է ավելի քան 50 հուշարձան, այդ թվում՝ 10-ից ավելի եկեղեցի և մոտ 50 հուշահամալիր ու խաչքար:
